ط
مسابقة الشعر العامى

أحلام سيئة السمعة .مسابقة الشعر العامى بقلم / عبد اللطيف شاش من مصر

خاص بالمسابقه
فئة العاميه
عبداللطيف شاش
قصيدة /أحلام سيئة السُمعه

بنحب ساعات
وكتير بنكون فـ الهوى دايبين
وساعات بنكون عاقلين مجانين
وساعات حاضرين بـ ضمير غائب
فـ سياق أحلامنا المتزاحمه
وساعات بنتوه جوه حبايب
نسيونا فـ دوامة الزحمه
وساعات أصحاب الحزن غياب
وساعات أحباب سبب الدمعه
وساعات بنحب بدون أسباب
أحلامنا سيئة السُمعه
وتضيع أحلام ….جوه الأيام
ما ينوبنا غير بس سيرتها
يتفك الحبل اللي فـ أيديها
تهرب منّا تدخل متاهات
نسرح فــ حاجات
تفتح متاهات لـ حاجات تانيه
ملعونه يأحلامنا الفانيه
معدوده يأفراح الدُنيا
تتعد على الأيد الواحده
وأنا عاشق من صُغري الوحده
وخصوصاً لو فــ العربيه
نسيناكي ياوحده ياعربيه
ونسينا كمان أحلام ياما
وبفضل أخطائنا العّلامه
بنزيد أخطاء
وبفضل بلدنا الجذابه
بنزيد أعباء
وبفضل تاريخنا الأسطوره
نتحرك نخرج مــ الصوره
والرد القومي مستوره
سيبها على الله
حُط الأحلام بين سلطه وجاه
تلاقيها ناقصه
باقي الأطياف المغموره
فــ الوصف العام بتكون جاره
وتدقق تلاقيها مجروره
الرأي الخام قال فزوره
بالشكل المُبهم منصوره
نرسم ضحكتنا المجبوره
ونقول واثقين
فـ نبان عاقلين …لكن مجانين
فـ يكونوا حاضرين بـ ضمير غايب
فـ سياق الأحلام السمحه
أنا بطلب للشعب الرحمه
لو كان ممكن أو حتى يجوز
أنا بطلب أغلاق المسرح
أو نلغي الدور اللي تعبنا
دور الأراجوز

عبداللطيف شاش

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى