الرئيسية » مسابقة الشعر العامى » أرشيف القناة ..مسابقة شعر العامية بقلم / أحمد عطا من مصر

أرشيف القناة ..مسابقة شعر العامية بقلم / أحمد عطا من مصر

أحمد عطا – مصر
شعر عامية
٠١٠١٧٤٠٨٠١٤
قصيدة بعنوان : أرشيف القناه
………

اسأل تراب القناه
كام ألف روح ماتت
مدفونه من غير كَفَن
كام ألف صرخة آآآه
م القلب واتقالت
يشهد عليها الزمن
وسط الشراقي البور
كان الكفاح دستور
والجوع ف شَق العطش
فَجَّر طاقات النور
بس التمن والمهر
كان دم أجدادنا
والقهر فوق الضَّهر
كرباج بيجلدنا
والأرض لون الدم
والفاس ف ساعدنا
تضرب تشُق الشقا
والمولى ساعدنا
نحفر تاريخ أبطال
ونورثوا ولادنا
………. نَهَب الخواجه العَرَق
نهب الخواجه العرق
والخير مجاش لينا
واحنا اللى كسَّرنا
واحنا اللى شقِّينا
نَشِّفنا ريق الصبر
والصهد كاوينا
والرمله كانت قبر
والقبر صار مينا
وصَّلنا بحر ببحر
من بين أراضينا
من غير دجل ولا سحر
نحتينه بإدينا
تحيه للأبطال
أجدادنا أهالينا ….
….. وعدَّا قَرن وفات
وعدَّا قَرن وفات
والثورة جَا دورها
تشفى غليل أموات
مقهوره ف قبورها
وصعيدي شهم أصيل
أممها حررها
ناصر نصرها زمان
علشان نكبرها …………
……… مَر الزمن بينا
ساقية سنين بتدور
بقا كُله واقف ف الطابور
مستنى دور
عشمان ف كنز من السما
وعروسه بيضه مقسِّمه
ولا حد فكَّر يوم يخضَّر
نُص شبر ف أرض بور
والكل ثابت فى الطابور
إصحا يا مصرى
إغضب وثور
ثور ع البطاله وع التواكل
ع اللى ناهب واللى واكل
واللى بانى بحق غيره
واللى بيمرجح ضميره
لاجل ما يعلى القصور
إغضب وثور
بَطَّل مَلل
كسَّر عكاكيز الشلل
ثور وانتفض
احفر أمل
إرويه بعرقك والعمل
يطرح ببركة ربنا
والكنز يصبح مُحتَمل
….. قالوا القناه هتعوز فلوس
طَب نستلف ؟
أصلاً زمان من قبلنا قالولنا ان السلف تلف
طب نعمل ايييييه ؟؟؟
جانا الولد
وقال خلاص . نعمل سَنَد
يضمن حقوق اللى اشترى
ويجيبله خير ملهوش عدد
وبشرط
مش برا البلد
مبنبعوش برا البلد
تسلم دماغك يا ولد
….. طرحوا الشهايد فى البنوك
ومكنتش اتصور كدا
والله ما اتصور كدا
ستيييين طابور مترصصين
مدِّين ايديهم للولد
وبيقولولك يا بلد
إحنا السند
على ربنا راح نعتمد
مالنا وعيالنا ونفسنا
وهبينها ليكى للأبد
واحنا السند
تسلم ولادك يا بلد
…… فى الاجتماع
ودا كان مُذاع
قال لك هنحفر وف سنه
كلمه انتهت
هِيَّا السنه
ورده وزرعها وفتَّحت
شريان حياه
وف ظرف عام
بإدين ولادِك اهو اتنحت
أجمل هديه يا بلد
تسلم دماغك يا ولد
تسلم ولادك يا بلد
عاشقين ترابك للأبد
عاشقين ترابك للأبد

تعليقات

تعليقات

عن همسه

فتحى الحصرى صحفى فنى ومصور فوتوغرافى محترف ..الصورة عندى هى موضوع متفرد قائم بذاته والكلمة هى شرف الكاتب هكذا تعلمت من اساتذتى فشكرا لكل من تعلمت منهم

شاهد أيضاً

مصر ست الكون بحالو. مسابقة العامية بقلم / محمود ربيع من مصر

قصيدة عاميه (مصر سِت الكون بِحَالو) محمود ربيع عبد الحميد مصر اسيوط ديروط …………………………………………. مصر …

10 تعليقات

  1. الأسم.نجلاء أحمد أحمد
    جمهورية مصر العربية الإسكندرية
    رقم الهاتف ٠١٠١٥٠١٤١٠٤
    قصيده عاميه بعنوان
    مصر المستقبل
    مصر المستقبل يا ولادنا
    حطوا البصمه وعلوا امجادنا
    بكره معادنا ومعاه عيدنا
    جاى تاريخنا الحلو يعيدنا
    لحظة صدق تشع نجاح
    بيها يارب ان شاالله اوعدنا
    وابدأوا بالعلم المفتاح
    هو سلاحنا لبكره وزادنا
    هى وراثه ولا فراسه
    لازم نطلع زى اجدادنا
    مش محتاجه تقليد ودراسه
    لما نلاقى طموحنا أخدنا
    إحنا فراعنه وبعد اوجاعنا
    صرخة طلقه وراها ميلادنا
    عمر الوهم ما راح يخدعنا
    عدى علينا الماضى وفادنا
    مصر. سلام العالم كله
    تلقى كنيسه ف حضن المدنا
    واللى ما يعرفشى حنقوله
    خير أجناد الدنيا أجنادنا
    واوعوا اليأس اليأس خيانه
    خلوا أملنا هو عمادنا
    أرضنا نبع الخير مليانه
    أصل خزاين الأرض بلادنا
    واحمدوا ربنا إنه إدانا
    مصر كنانه وبيها سعدنا
    نجلاء أحمد أحمد القط

    • لايسمح سوى بقصيدة واحده فى كل تصنيف

      • يبدو أن الشاعرة نجلاء أحمد وضعت قصيدتها عن طريق الخطأ فى تعليق على مشاركتى بدلاً من أن تضعها فى تعليق الإفينت
        برجاء تفهم ذلك.
        أما بالنسبه لى فأنا شاركت بنص عامية ونص فصيح تفعيلة
        إن كان هناك مشكله فى ذلك فأنا أأنسحب من مسابقة التفعيله وتكفى المشاركة العامية
        وشكرا جزيلا للمتابعه

  2. عبدالرحمن السيد نورالدين

    عبدالرحمن السيد
    من مصر

    (ماما)

    ماما, ياما سهرتى عشانى ياما
    ياما تعبتى عشانى ياما
    شمعه ايده ونورها ياما
    انتى يا ماما

    لما اغلط كنت انتى تلمى
    ولما أزعل كنت انتى تواسى
    وتخدينى فى حضنك وضمى
    وتبوسى على عينى وراسى

    ياما سهرتى عشانى ياما
    ياما تعبتى عشانى ياما
    شمعه ايده ونورها ياما … انتى يا ماما

    الف تحيه والف سلامه
    ليكى انتى وبابا يا ماما
    دا إنتى عندى غاليه وسكر
    أد كل الدنيا دى وأكتر

    ياما سهرتى عشانى ياما
    يا تعبتى عشانى ياما
    شمعة ايده ونورها ياما … انتى يا ماما

  3. السيد نورالدين

    السيد نورالدين
    من مصر

    (انتهينا)
    انتهينا وانتهيتى واتهيت احنا الاتنين انتهينا
    التقينا وبعد قصة حب حلوه انتهينا
    انتهينا وانتهى عهد الكلام
    عهد المحبه والغرام
    مهما قلتى ومهما عدتى
    ودمعتينك وفارهم
    انتهينا
    انتى فاكره انى هضيع عمرى كله علشان عنيكى
    ولا فاكره هبقى عاجز لو فى يوم هشتاق اليكى
    متصدقيش
    متصدقيش لو قالولك انى صوتك لسا فاكره
    او جمالك لسا عابده
    او بمحرابك بصلى
    او بموال قصتك لسا بغنى, لا متصدقيش
    متصدقيش, النهارده انا شكل تانى
    كنت طيب, كنت مخلص, كنت صابر
    النهارده بقلب جامد عايز اقولك كلمه واحده
    انتهيتى
    من نهايتك كانت بدايتى وابتديت
    ابتديت احلم وهحلم
    طول ماقلبى لسا نابض
    ابتدين اخدع واقولك
    انى كلى ليكى رافض
    ومهما قلتى ومهما عدتى
    دمعتينك وفريهم
    يمكن فى قصة حب تانية تحتاجيهم
    اما احنا, أنتهينا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *