الرئيسية » مسابقة الشعر العامى » أنا صايم .مسابقة شعر العامية بقلم / ابتسام عبد الصبور من مصر

أنا صايم .مسابقة شعر العامية بقلم / ابتسام عبد الصبور من مصر

الاسم: إبتسام عبد الصبور
العنوان: القاهرة
نوع المشاركة: شعر العامية

( أنا صايم )

عن الكلمة اللي تاخدني
ويسرق عطرها ودني
يسمعني ويشجيني
يموتني ويحييني
ولما أدوق
يزيد الشوق
يخليني
لا أنا صاحي
ولا نايم
أنا صايم

عن البسمة اللي تسرقني
وطعم المن والسلوى
تدوقني
أناديها …
واتوه فيها
تغرقني
ما بين اتنين
ولا اعرف فين
ده نصي عالبساط نايم
ونصي ف عشقها هايم
وأنا صايم

عن التنهيدة واللهفه
وأنا والنار على كفه
وجنة ربنا ف كفه
غريق في بحورها
لا مرسى ولا دفه
وقوللي إزاي ؟
وأنا بردان
أشوف النار ولا ادفا ؟
وآخد في الجمال لفه
وقوللي إزاي ؟
أدوق الشهد في صيامي
واستكفى ؟
يالايمني بلا رأفة
وإنت في الجمال عايم
وأنا صايم
أنا صايم

عن النظره لعودك
لما يتمايل
أهاودها ، واباعدها
وتتنهد ، وتتحايل
وأنا في السحر متبعتر
مابين الرقه والمنظر
وتنهيدها
وضعفي اللي مساعدها
أقول: دي نعمة م المولى
وسبحانه بعتهالنا
تسلي عطشنا وصيامنا
كريم عمره ماكان حارم
وأنا صايم
أنا صايم

تعليقات

تعليقات

عن همسه

همسة هى مجلة كل الناس وكل الأعمار . المهنية والصدق شعارنا .ننقل الخبر من مصدره الحقيقى ونسعى دوما للتجديد من أجل القارئ

شاهد أيضاً

مصر ست الكون بحالو. مسابقة العامية بقلم / محمود ربيع من مصر

قصيدة عاميه (مصر سِت الكون بِحَالو) محمود ربيع عبد الحميد مصر اسيوط ديروط …………………………………………. مصر …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *