كان نفسي اكون طيب ولو حبة
باشبه أبويا شوية مش أكتر
ما انا مستحيل حاورث نيون الوش
أو نور خرافي بيبهر الماشيين
طالع من البصة
ومنور الشارع
هبني ورثت ملامحُه من بره
هبني ورثت سجايرُه
ولاعتُه
أيام ما كان بيدخن السوبر
قبل اما قلبُه يحن للجلطة
وورثت دكانُه وضيعتُه
وورثت ريح الصدق ف بضاعتُه
وورثت قفطانُه اللي كان ع الباب
وأمل ف بُكره ولو طلع كداب
صعبة الحياة ؟!
عادي ماليش دعوة
اليأس حل ؟!!
بس الأمل أكبر
حلوة الليالي .. يخلق الحواديت
مُرَّة الليالي .. يخترع سكر
كان نفسي اكون طيب ولو حبة
باشبه أبويا شوية مش أكتر
……………………………………………………
الحضرة حانت والمشايخ جُم
وانا كنت طفل ف ليل بعييييد جدًا
ماسك ف إيدي مسدس المَيَّة
وبروحي ماسك ف السما الأولى
مستني بس ان العشا تدن
واصعد مع الأحباب بلا رجعه
أصعد معاهم للسما السابعة
كان ليا عين راشقه ف هدومُه وبس
بتروح مع القفطان يمين وشمال
أول ما عمو المنشد الغلبان
يبدأ يقول ” اللللللله ” تلات مرات
يتشد جسمي يقلد الحركات
ويروح يمين وشمال مع الأحباب
لكن ف عقلي حاجات ماليش فيها
كلمه و أبويا زرعها فِيَّا الصبح
إوعاك تقزقز لب ف الأوضة
أصل الملايكة حينزلوا الليلة
وحيقعدوا طول المسا فيها !!!!
كان نفسي اشوفهم بس وانا طاير
كان نفسي اشوفهم بس مش أكتر
لكن ما شوفتش حاجة تقريبا
ولمحت بس الأوضة بتنَوَّر !!!!
واللهِ شُفت الأوضة بتنَوَّر
كان نفسي اكون طيب ولو حبة
باشبه أبويا شوية مش أكتر
