مسابقة الشعر العامى

إيمان . مسابقة الشعر العامى بقلم / هيثم عبد الحميد عبد الكريم . مصر


هيثم عبد الحميدعبد الكريم
مصر
مسابقة الشعر العامي

قصيده إيمان

بتنسى الساعه دقاتها
و عمرك إنتي مانسيتي
تصحي لي عيون مظبوطه دقاتها
بتوقيت إزدياد الشوق و توقيتي

******
و حسيتي .
بلهفه فـ الفؤاد نحوك
و صحاكي الحنين قالك
خلاص إشتاق
يشوف الإرتياب صحوك
فيتبخر و يفضلك
دموع الخوف علي الأحداق
و خايفه السهره لو تخلص
تلاقي الوقت ما يساعشي حكاوي اليوم
و أفضل لك
تسيبي عنيكي سرحانه
كطفل صغير . بيستنى ظهور العيد
و لا بتغفل ولا يضحك عليها
النوم
*******
و هميتي تصحي البدر
أكيد نعسان من إمبارح
رفعتي ستارة أخر حلم
و ليلك بان
و نبض وريدك المَوتور
يفوق عطشان
كلام الأمس ما قدرشي
ساعتها يحد من ظمأه
كأنه بيضن و بيبخل
ونزف الوقت زاد زنقه
فـ ركن الهامش المهمل
و دمع عنيكي شاف العتمه بتسلم
لأول ضي قام سبقه
ببحر دموع و دوم يكمل
و كان يتمنى لو شنقه
ويفضل ليل و ليل أطْول

******
لذلك جايه من بدري
لعل الحده في شوقك
فـ أول حضن تتلم
*****

إتصال 1
_ صباح الخير
= صباح الفل يا حبيبتي
_ بدون تفكير صحيت إمتي
= فـ لحظة ما طلبتي إنتي
_ و عايز إيه ؟
= لأن البدر فـ عيونك يبان أكبر
عشقت أسهر
وأحني لك إيدين الليلة بقصايدي
فتتحول للون أخضر
و تكسي كل أركانها
حدايق فـ الفضا تكبر
مايسكنهاش بشر إلا أنا و إنتي
و كام نجمايه تخدمنا
*****
إيمان وإنتي إيمان فعلا
و معنى حقيقي للتصديق
و قلبك نور حنون جدا
بيفتح لي دروب من ضي
لو مره حياتي تضيق
******
و لا كان لك في عمرك عمر هيكمل
يا دوب رحله
جازفتي معايا م الأول
وعارفه النصيب أعمي
يبكينا فـ 200 مشهد
كأن الدنيا دي داعمه
جميع الكون عشان يشهد
دموع الحيره فـ عيونّا
إيديكي و هي بتفارق
بخوف إيدي
تجّمد دمي فـ وريدي
و حِسك إنتي بالخنقه
عشان دمي ما يوصلكيش
و كابرتي
رسمتي لي خطوط سيري
و نفسك ضايعه بوصلتها
صنعتي الجنه أخر الشط
وروحنا تتوه ما وصْلتها
ولكن لسه بلقاكي
*******
تطلي فـ روحي من بره فـ ساعة فجر
و تتلو لقلبي بخشوعك
لحون البدر
وتِداري فـ كسوف خجلك
لو اتأمل بحور عينك
واشوف فوران
وألف محيط ينافسها
يحث أمواجه ع الثوران
فتكسبهم
كأن عنيكي ألف طوفان
غموض محفوف غموض أعظم
طلاسم صعبه ع التفسير
و فيهم موج بيتعظم
و بتعجب مازلت بشوفك الجنه
و أشوف عينك عيون عصافير
******
إتصال 2
صباح الخير
= وحشتيني
صباااح الخييير
= وحشتيني
ياريت تحكي عن يومك و بالتفاصيل
_ فتتنهد و تسكت دهر _
” و يومها أصله كالعاده ما يتغيرش
بتضحك لي عشان خاطر ما هتدمعش
فتكسر فيا أخر ضحكه .
مخبيها عشان ترسم شفايفها
كأن القلب شايفها
فكاشفها … فماتخبيش ”
إيمان….. بتحكي لي كأن عنيكي فـ عنيا
تحسي بدمعي متداري ورا نني
أشوف فجأه جيوش للحزن همجيه
كما التتار تغطي عيونك البني
******
وبدر الليل نعى دموعك
وظهرت كل نجماته بلون أسْوَد
حداد على حزنك المقصود
كأن الكون بيتعهد
يخلي الفرح باب موصود
وإن كنتي بتاخدينا لماضي فات
*******
بتطلبي مني أحكي لك
وبحكي لك و بتغيري
قفلتي الخط 100 مره
عشان خاطر
عيون فيفي … ذنوب بسمه …. عيوب ساره
و حتي لما كنت أحكي
نزيف الروح
و بتملي وتتغلي
بكل حكايه عن شرشر
*****
و تغضبي من تحدي السرعه للسهره
و هروب الليل و توديعك ببحر دموع
و عن حكايات بتنهب وقت . و كان أحرى
نسيب مافات . مانفتح فيه ولا موضوع

******
يا عارفه حكاوي عن ماضي … دبح قلبي
و مش ذنبك ……… أعيدها تاني قدّامك
ما كنتش ع اللي فات راضي … ومن غلبي
و حنان قلبك …..أقولها بحسره فتزوّد فـ آلامك
*****
يا باقيه فـ الوجود . ضاعو
جميع من خان فـ يوم حبي
و حقك تفرحي . باعو
و جيت لك تملكي قلبي
******
بحس ساعتها فـ إيديكي …
بأني ضعيف
تشكلي قلبي بسهوله كما الصلصال
و ألمي فجأه يتحول لوحش مخيف
وأحس برعشه في الأوصال
******
آلاقي نفسي شئ ميت
تزورني عنيكي تحييني
تنسيني جميع الكون
ولا لحظه بتنسيني
و إحساسك كعرافه
تحسيني
ولو قلبي كتاب مقفول
بتقريني

و حافظه لي تاريخي صم
و عارفه كل ما قد كان
و كل ماكان بدونك وهم
و بوجودك بقيت إنسان
*****
تضميني فـ أحضانك
جروحي م الدفا تُشفى
تشوفي فيا أحزانك
آلاقي عنيكي تتصفى
ودايما كان فـ حسبانك
دموعنا تسيل
جميع جوارحنا تتدفّى
*****
يا حابسه الآه جواكي
و كاتماها لتظهرلي
لكني عليم بنجواكي
و أسرارك بتنهرني
لأني كاشفها كالعاده
فيبكي قلبي بزياده
على وجعك
و من وجعي على وجعك
أكيد خدعك . ألم قلبك
و لما ضاق عليه صدرك
فـ ساب القلب و إتمرد على روحك
ما يعرفشي الغبي إني
بقيت روحك
ياريته كان يدمرني
ولا مسّك . دا لو حسّك
و حس بدفئ إحساسك
ما كان يإذيكي بغباؤه
*****
إيمان …
أنا عاشق و مش خايف
أسلّم قلبي لأيديكي
معاكي بدوب و أنا شايف
حنان الدنيا فـ عنيكي
بيتخلى الجميع
و تفضلي إنتي با قيه لي
و بتعدي إقترابك زُهد
و كارهه الدنيا علشاني
فوقعتي للروحين العهد
بإذعانك و إذعانك

******
حضنتي روحي بكفوفك
وحست باللي كان مكنون
و روحي لما بتشوفك
تشوف فـ عنيكي كل الكون
******
و فجأه تحتويني بصمت
أطوف جناتك الخالده
وحلم العمر ألمحها و لو في حلم
رسمناها فـ الخفا لكن
ملايكه كتيره عندها علم
******
لذلك عشت أتوه فيكي
و بهرب مني لعنيكي
أسيب الروح جسد ممدود
على شطوط الهيام بيكي
*****
إيمان ….
حياتي وإنتي مش فيها و لا تتعاش
فأغيب عني . يبان إني ما بشبهنيش
ليالي كتيره من عمري مابحسبهاش
لأنك فيها ماظْهرتيش
و أصل العمر مش كام عاش
دا عمري بيتحسب بيكي
و قد ما قلبي بيشوفك دا قد ما أعيش

هيثم عبد الحميد عبد الكريم
01010533111

تعليقات

تعليقات

الوسوم

همسه

همسة هى مجلة كل الناس وكل الأعمار . المهنية والصدق شعارنا .ننقل الخبر من مصدره الحقيقى ونسعى دوما للتجديد من أجل القارئ

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق