ط
الشعر والأدب

قصيدة : مستغرب ليه؟! .. للشاعر / رضا أبو الغيط

*************

مستغرب ليه

من كم التجاعيد اللي ف وشك

ومراية مش قادرة تغشك

ولا قادرة تغير ف ملامحك

يا ابن الأخيار

أيوة كبرت

وزمانك فات

وعليك اندار

والشعر اللي بيشبه

لسواد الليل

بقى لون الصبح

الطارح أنوار

أيوة كبرت

والقلب اللي اتحمل

سنوات الويل

مش حمل دموع

ولاحمل الجرح المنقوع

ف آهات ومرار

فبلاش أعذار

واختار السكة اللى توصل

الى بر أمان

وبلاش تختار

سرداب العتمة اللى بيولد

دايما أحزان

وبيشعل ف القلب النار

ليل ويا نهار

مستغرب ليه

من كم التجاعيد اللي ف وشك

ومراية مش قادرة تغشك

ولا قادرة تغير ف ملامحك

يا ابن الأخيار

أيوة كبرت

ومرايتك تشهد وعينيك

وعروق الدم اللي بترسم

أنهار ف ايديك

والعقل اللي ما قادر يهضم

كل الأفكار

أيوة كبرت

وماعدتش غول

ولا حتى صياحك بيخوف

قلب الأشرار

قاعد ف البيت

مركون ع الحيط

كٍيف الفُخار

عكازك شاهد على ضعفك

والخطوة اللي ما قادرة تكمل

باقي المشوار

هتموت م الجوع

وسنانك مش حمل صراع

مع طبق الفول اللى هزمته

ف ربيع العمر

وكتافك مش حمل الهم

اللى حملته

ف سنين الكر

والحلق اللى اتعود على طعم المر

مش حمل مرار الصبار

أيوة كبرت

فبلاش تحتار

وبلاش أعذار

واختار الدار اللي بتأوى كل المساكين

واتقرب حبة من المولى اللى بيقبل

كل التايبين

واسمه الغفار

*********************

رضا أبو الغيط

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى