الرزق فوق ف السما: كلماتى
“”””””””””””””””””””””””
ما بامدش ايدى لحـــد
وبقسمتى راضــــــــــى
عيشتى صحيح ع القد
ما املكش غيـــــر زادى
===============
لكن وعهــــــــــد الله
القلب فيا بـــــــــــــراح
عاشق لحمـــــــد الله
وف ملكه انا ســــــواح
===============
ايوة صحيح المــــال
له عوزة ما انكرشــــى
واتمنى زى الخلــق
على بكرة ما اقلقشــــى
===============
لكن إله الكـــــــون
له ف العباد أحــــــوال
ياما كتير أغنيـــــا
بيعانوا راحة البــــــال
===============
الرزق مش أطيان
ولا ينكنوت ف بنـوك
ولا بهرجة ألــــوان
ولا سلطنة وملــــــوك
===============
الرزق عـــــزة نفس
وايمان بعدل الـــــــــه
والصبر ع المكتوب
مهما تكـــــــــــون الأه
===============
بين النهار والليــــل
تتبـــــــــــدل الأوزان
أمره ما بين حرفين
يبقى الفقير سلطـــــان
===============
الدنيا مهما تكـــــون
سبوبة للأخــــــــــــرة
والاخرة جنة ونار
والعبرة بالتجــــــــرة
===============
إرضى تنول الرضا
واسعى لوجه كريم
رزقه فى سابع سمــا
وبحال عباده عليم
مجلة همسة شبكة همسة ..مجلة فنية اجتماعية ادبية رياضية شاملة
شكرا للحبيب فتحى الحصرى ولكل القائمين على هذا الصرح الراقى