ط
الشعر والأدب

الزفة ..قصيدة للشاعرة / جهاد زيادة

جهاد زيادة
“””””””””””””””””””
((( الزفه )))
النهارده عيد ميلادي
كنت متعود يا أمي
ان فيه ارقص و أغني
تضحكي ، تقومي تضمي
تقرصيني من وداني
تملي كل البيت أغاني
كنت متعود ألاقي
فرحه جامده من جيراني
تعمليلي تورته حلوه
تنوريلي البيت بغنوه
و الهديه كات قميص
لون جديد
منقوش عليه كل الأماني
تحضني فيا القميص
تدعي يوم ابقي عريس
تختاريلي بنات كتير
مين يا غاليه تكون ونيس
و أما جات الزفه كانت
كات يا أمي زفه تدمي
متخافيش! هيقيدوا قبري
نادوا قالوا الاسم صبري
جهزوا توب العريس
لبسوه أحلي قميص
و العروسه كات رصاصه
و القميص أصبح كفن
بس زغروتك يا أمي
كفنتني بدون كفن
كانت الحنه أمل
حنوا دمي بالكفوف
أصل دمي ملوش تمن
رشي فوق القبر حنه
طهريهم م العفن
لو صحيح أنا غبت عنك
جسمي عمره ما اندفن
و وزعي كل الشموع
اللي انطفت
و أمسحي دموعك حبيبتي
اللي قبري غرقت
و أحلفي بيوم فرقتي
اللي قلبك مزعت
ان عمر ف يوم يا غاليه
ع الشهيد ما هتجزعي
يوم ميلادي
قيدي يا أمي الشموع
أوعي تنسي تفرحي
و ابقي روحي … عند قبري و زغرتي
ابقي روحي… عند قبري و زغرتي

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى