الشعر والأدب

السقا مات …قفصيدة للشاعر / احمد الخليفة

أحمد الخليفه

السقا مات
والعطش صاب البلاد
والقربة تعوي دندنة
كل اللي فاضل مني
حتة جلدة ميتة
السقا مات
كده من سكات
لملم حبالك يا حزين
وادفن بيارك للأبد
وافتل الحبل اللي داب
من شدتك
اربط على ضهر الزمن
وكتّف النفس اللي طالع
بالوجع
السقا مات
والسقف طقطق م الوجع
أقفل بيبان الذكريات
وغطي حيطك م الشقوق
تعابين كتير تستنظرك
أوعى العقارب تلسعك
شق اللي فاضل من عباية
الهم فيك
واقفل الشق الغبي
وإياك تقول الصبر لسه سكتي
دي الارض منك تشتكي
منتاش نبي
ولا عمر حلمك كان غبي
السقا مات
كل الشوارع تندب النور اللي كان
الشمس نامت للمسا
والحق كان بيك واتنسى
وانت اللي بتجر الحبال
بتطلع الحق اللي مدفون في البيار
وبتروي كل العطشانين
وانت اللي ليهم ديدبان
إلحق الحق اللي تايه عننا
بس انتهى والكل كان
السقا مات
والشوارع خالية من جري الصغار
مفضلش فيها غير غبار
والطرق فيها انتحار
وانت اللي وحدك في الطريق
شايل الخير للجميع
ميتك فيها النجاة
والكل بيقول :” ليه مرار “؟
لا عرفوا فين اخر الطريق
ولا حتى ليهم اختيار
السقا مات
خلفتك كانت بنات
واللي مشيوا في الطريق
عشقوا السكات
مين يورثك يا خط مرسوم للشقا؟
مين يخلفك يا ابو البنات
وادي جنازتك ريح سكات
مفيهاشي حد يشيعك
غير قربتك وقفت على راس الطريق
وانت الطريد
من دنيتك

الوسوم

همسه

همسة هى مجلة كل الناس وكل الأعمار . المهنية والصدق شعارنا .ننقل الخبر من مصدره الحقيقى ونسعى دوما للتجديد من أجل القارئ

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

إغلاق