السلام عليكم
الإسم /أحمد السيد طاحون
خاص بمسابقه الشعر العامي
بحب الموسيقى في صوت البلابل
وجرس الكنيسه وصوت الادان
بحب المكان اللي عايش وعاقل
وفاضل في عقلى شويه جنان
بحب المحبه ف عيون المدينه
وباعشق شروق شمسنا و الجيران
بحبك يازارعه في قلبي المحبه
وساقيه شراييني ود وامان
بحبك يادايسه على كل ظالم
بحبك ياحاضنه تقاوي الحنان
بحبك ورافض اقولها لغيرك
وانا فيكي طاير طليق العنان
بحب الاغاني في صوت السواقي
واحب السنابل وزرع الغيطان
بحب الزحام اللي مالي الشوارع
وكل اللي حبك في وسط الميدان
بحب الموسيقى في صوت السلاح
ساعة لما قالوا ياجندي الكفاح
بحبك وراضي اعيش فيكي ليكي
وفي عنيكي يابلادي الاقي البراح
بحبك يافارده شراع المحبه
يابحر المشاعر وبالخير ملان
بحبك وهافضل اقول لك بحبك
ولو داق عليا الزمن والمكان
قالوا لي الحب مش لينا
عشان ماسكين في ايدنا سلاح
وانا اللي العشق خلاني
اعيش حارس مسا وصباح
حبيبتي صعب يهينوكي
وانا عايش على ارضك
حبيبتي بروحي افديكي
وانا فيكي باعيش مداح
قالوا لي الحب مش لينا
عشان ماسكين في ايدنا سلاح
قالوا لي ازاي بتعشقها
وزي بلاد كتير هيه
جاوبت وقولت ببساطه
هاتوا لي مثيلها في الدنيا
انا عاشق تراب بلدي
وربيت ع الحنين ولدي
اعيش فيها واموت فيها
وليها عمري بالثانيه
قالوا لي ازاي بتعشقها
وزي بلاد كتير هيه
وآخر كلمه في جوابي
هاقولها لك بعلو الصوت
انا اللي قلبي داب فيكي
ف مش فارقه حياه او موت
في ناس واخداها لوي دراع
وناس في الغدر ليهم باع
وناس عايشه الحياه ابطال
ورجاله تموت في سكوت
هاقولها لك بعلو الصوت
بحبك موووووت
#أحمد السيد جابر طاحون(فهد طاحون)
