الرئيسية » الشعر والأدب » الشهيد حندقة :بقلم الشاعر / رمضان العلالقة

الشهيد حندقة :بقلم الشاعر / رمضان العلالقة

رمضان العلالقة
ــــــــــــــــــــ
نادوا عليه الشــهيد حــــندقـه
قــــلت و حـــلت البركــــــات
و لما البـــيه فتــح الدفــــــــتر
بين إنـــه بتـــــاع جــــــنايات
قـــال البــيه فين هى الجـــــثة
و فين يا راجــــل ابنك مـــات ؟
قال يا بيه على باب المركــــز
و أنا معـــــايا أربع شـــــهدات
كلمة حــق الناس شــهدوهـــا
كـــــان بيطرقـــع بالطـــلقات
أصل يا بيه لا ليــنا في الثورة
و لا بنفهــــــم في إنتخــــابات
قال له ابنك مات فى الثـورة ؟
فى التحـــــرير والإتلافــات ؟
قال يابيـــه لاء محصــــــلشي
لسيادتك أحــــــلف بالطلاقات
إبنى تاب من أخر مـــــــــرة
و الحــتة بتحكى عليه حكايات
غيرشي كان بيلقط رزقــــــه
من شـــــوارع و محــــــلات
و أهى الحالة كات معقولــــة
لكن يالا أهــو ســابنا و مــات
مهو البركــة يابيه فى سياتــك
مش هــــتوزع علينا شيكات ؟
ياريت يابيه فى مراته تخدمـا
مهى يلزمــــها شوية زيـارات
قبل الثورة و أهى مسجونـــــة
فى القنــــاطر مــــع الســـتات
هــز البــيه راسه شـــويـــــــة
فتــح الدفــــتر مــلاه كتابــات
قال البيه أهى كلمة نقولهـــا
عشـــان تتــحدد المســــــافات
و كــل واحــــد ياخـــذ حــقه
مــش بالفوضــى بالحســابات
و عشان ما يضيع حق الشهدا
بين بلطـجية و بين عصــابات
و اللي عايزين ياخدوا الثورة
بعـــــد ما بانوا في الجلســات
قالوا خــــلاص إحنا اتغـيرنا
و كله مركب كـــمان دشات
يعني حــــالنا مش عارفينه ؟
كله أقســـاط و كمـــــــبيالات
راحــوا و جــابوا أبو حـندقة
و جــــي مزور مستـــــندات
يزنق دمـــه في دم الشـــــهدا
و الشعب يكافؤه كمان بشيكات
روح يلا يا أبو حــــــــــندقة
روح وقــــتك عدى و فــــات
و البهاوات اللي كانوا ساندينك
أهو بيتحــاكموا في الجــــنيات
شفت الراجل حـــمر عيــــــنه
قال في هدومي عشر سنجات
جـــــاله شــــاب و كــتر خيره
كان علي كتفه تلات نجمات
قـال الحـال دا بقينا رافضـــينه
لا أبو حــــندقة و لا بهـــاوات
و الشهـــــيد اللي عــــــايزينـه
يكون شهـــيد فوق الشبـــــهات
مـش ابنك برده يا ابو حندقــــة
مــات مطلــــوب للجنــــايات ؟
رايح يولـــع ليه في المـــــركز
عـــايز يحرق مستـــــندات ؟؟
قـــال له روح يا أبو حــــــندقة
ثــــــورة إيــــه أنت بالـــــذات
روح يلا و شــــوفلك شـــغلة
و متحكيش معــــايا حـــكايات
و قــــبل ما يروح أبو حــــندقة
شــــفت لمه كـــــلها ســـــتات
كله لابس أســــود في أســـود
قلت يا ناس فـــيه واحــد مات
قـــالوا خـــالــــتك أم سنـــجر
جــاية تطــالب بمستحــــــقات
ابنها مــــات قــــــدام الســــجن
كان مضروب بأربع رصاصات
عـــاش في الشـــارع كل سنينه
وشـــه كـــــان مليان علامــات
حــــالها أتغير بعـــد الثــــورة
مهو لا شغل و لا دق سـاجات
لمـــة النـــاس دايما حوالـــها
و قاعـــدة تنظم في احتجاجات
حــق الشـــهدا مش طـــايلينه
كـــله جي و بيقــــول هــــات
شــفت الشــاب بص بعيــــنه
اللي علي كتفه تلات نجمـات
سنجر ؟؟؟؟
م إحنا عارفينه
ليه بيقولوا اللي أختشى مات ؟
*****************
بقلم / رمضان العلالقة

تعليقات

تعليقات

عن همسه

فتحى الحصرى صحفى فنى ومصور فوتوغرافى محترف ..الصورة عندى هى موضوع متفرد قائم بذاته والكلمة هى شرف الكاتب هكذا تعلمت من اساتذتى فشكرا لكل من تعلمت منهم

شاهد أيضاً

هل أتاك حديث قلبي..قصيدة للشاعر / رشيد حمانى . الجزائر

هل أتاك حديث قلبي {1} يَا حَبِيبي لا تُفَكِّرْ فِي الرَّحِيلْ ياحَبِيبِي كَيفَ تَسْلو اليَومَ …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *