مسابقة الشعر العامى

الغربة . مسابقة الشعر العامى بقلم / أسامة العتمانى.مصر

أسامة العتمانى من الاقصرقصيدة شعر عامية بعنوان {الغربة

01066506568
ازيك يامة
ردت بس
من غير نفس
زينة ياولدى
خيطنا الشنط
بس شيع لاختك
خليها تهوي شوية ملوخية
زى ماقلت

عبيتلك جوز من علب السمن
رمت الشال ع شقة
وقالتلى حد كوالك جلابية تسافر بيها
انا عارف امى بتتحدت لكن الحزن كاويها
وقلبها متقطع ع مية حتة
لما عارفة ان انا هبعد عنيها
وانا حبيت اخدها واسرح بيها
لكن فين طول مانا قاعد
منكوتة فى عينى عينيها
قالت مرت عبده الصايغ
عاملة جمعية
شوف ان كان مقدرتك ادخل فيها
زى ماقالو نواية بتسند زير
اختك جابت كرتونتين
واحدة فيها البط مجمد
والتانية فطير
قربت منى مع ان رجليها
وجعاها تحرك رجل
وعلى متقل التانية عايزة نهار
لكن القيتها جمبي
وانا بقيت زى خشبة
ونكتو فيها المسمار
قالت امانة عليك
غير كسوة عيالك
ماتجيب
وكلمنا اول ماتروح
واوعى تطول
ولا تغيب
احمد ولدك
بيجيبلي التلفون
وبنكون شايفين صورتك
وانت بتحدتنا
لكن القلب بعيد
كنا زمان نبعت لخوالك
لما كانو مسافرين
ياجى عشر شرطان
كان جدك يسجل صوتنا واحد واحد
نسلم ونبعت مراسيل
وارطال محبة وود
ونشوف حد مسافر ايها حد
لكن نستنى شهور على مياتينا الرد
لكن برضه الدنيا غير الاول
دلوك بنشوفك بالصوت والصورة
لكن برضه قلوبنا مكسورة
الشوفة فى التلفون
زى مانت قاعد فى وشي
بتاكلنى بيدك
زى مابتقولى فى التلفون يامة اتعشي
النبي خاطري
ياواد
اقرب بلدك
واقرب سفرك
خدنا ايه من الكفلا
غير بيوت نست الناس
غير عيال تتربي فى حجور الناس
النبي دى ديرة راس
قولتلك قبل سابق بلادنا واسعة
وفيها اشغال
تطلع شمس عليك شغال بطال
بس اسمها قاعد و3سط عيالك
مش يشيلو الهم يبقو كبار ق
وهما لسه عيال
ولا مريتك ملهاش حق عليك
دى الست بتجوز عشان لما تنادى ع راجلها يسمعها وتبقي سامعاه
يبقي معاها وتبقي معاه
مش تبقي مسنودة فى البيت
زى غطاية الزير
وانت حتى اجازتك بتاخدها قليلة
عايز تاجى وتطير
الكلام ممنوش فايدة معاك
روح للكفلا بيستنوك
عجبي يادنيا حد
حد يسيب الورد
ويتشعلق فى الشوك
كلملى اخوك
قله حجزلى عند الدكتور
اها انا تعبانة وقاعدة فى البيت
زى اللى فاتها الدور
قوم يلا عبيلك كرتونة عيش
وحزم شنطك
واهى الدنيا بينا عاد
ياجيت القيتنى
ياملقتنيش

الوسوم

همسه

همسة هى مجلة كل الناس وكل الأعمار . المهنية والصدق شعارنا .ننقل الخبر من مصدره الحقيقى ونسعى دوما للتجديد من أجل القارئ

مقالات ذات صلة

‫2 تعليقات

  1. الشاعر اسامه العتماني..
    هو شاعر يتميز بموهبة فن الارتجال وفن مايسمي بالواو..او الشعر العامي كما يطلقون عليه…
    وقد استطاع في فتره زمنيه قصيره ان يأثر قلوب الكثير ممن يستمعون الي شعره..وجمال وحلاوة الالقاء ..وقد استطاع ايضا ان يصل بسرده للشعر ..وما تدور من احداث في مجتمعاتنا العربيه بطريقة معبره..وقصيدة الغربه بااجزائها ..شئ متميز يدل علي اتقانه للشعر ..وسيكون علي نهج وطريقة الخال الابنودي ..اتمني له المزيد من التقدم..

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

إغلاق