ط
مسابقة الشعر العامى

أموات بتشيع أموات.مسابقة الشعر العامى بقلم / عبد العظيم عبد المنعم عباس.مصر


الاسم / عبدالعظيم عبدالمنعم عباس
العنوان/ جمهوريه مصر العربيه – اسيوط
رقم الهاتف/01276336537
الشعر العامى (اموات بتشيع اموات)
اموات بتشيع اموات
خمس اصحاب وعايشين فى الشارع
تعبان وكسلان و فنان وعالم و مزارع
رغم اختلافنا اتجمعنا وكله ليه هدفه اللامع
فينا التخين والرفيع والضعيف والمصارع
جمعنا شارع وفرقتنا الحرف والمصانع
ده حال الدنيا يعرفه كل شاهد وسامع
المزارع اكتر واحد فينا متعافى
يقوم الفجر يشق الارض وهو حافى
صابع ايديه كان كد كتف من اكتافى
دخل فى رجله مسمار واعر وجافى
خلعه ورماه وسلم يا مرحبا وعوافى
خايف يعرج يقولوله ربنا الشافى
ما رضى ياخد دواء ولامشروب دافى
وجه ميعاده فى ميعاده وكان اول متوفى
اتجمعنا احنا اربعه فى عزاه
دخل قبره ومحدش دخل معاه
صاحبنا العالم دعاله واحنا وراه
روح معمله وسط ابحاثه ودواه
فرحان بنفسه والعلم اللى اتلقاه
مسك علاج مخترعه ولسه ما سماه
قال اجربه واعرف قوته ومستواه
وقع فى الارض ومش قادر يقول الاه
واهو علمه موته مش هو اللى شفاه
واتجمعنا انا والكسول والفنان
ركبنا عربيته الفخمه الجنان
وكتبلنا مكان قصره بالعنوان
وحكى عن امواله والدهب والمرجان
وان ليه اصحاب انجليز والمان
وان كان فى حد ملك فهو سلطان
ونزلنا على جنب وبعربيته فرحان
جت عربيه رمل منعرف جت ازاى
شالته هو وعربيته مسمعنا قوله الاى
صاحبى الكسلان خايف من اللى جاى
هو محافظ على صحته ميشرب حتى الشاى
اكتر رياضه بيعملها انه بيلعب على الناى
خايف يعمل مجهود وقاعد على الواى فاى
بيت اتهد جنب بيته وقع عليه قالب
وجه امر ربك وامره هو الغالب
ميعادك جاى لو كنت طفل او شايب
لا صحه ولا علم كله مفارق وغايب
ولا فلوس ولا حرص هو اللى واخد والجايب
هوالخضر لما قتل الغلام كان عايب؟
ده امر من ربك ان كنت رافض او حابب
عرفتونى انا مين انا اللى تعبان من سنين
انا اللى فاكر انى اكتر واحد حزين
انا اللى ياما سهرت وكلامى هوالاه والانين
انا اللى طلبت من ربى حاجه من الاتنين
الشفاء او اروح لحبايبى الغاليين
وكنت ناسى ان ده اختبار وذنوب بتتشال
وان ميعادى لو جه مش محتاج اذن من عم او خال
الحمد لله رب العالمين على اى حاجة

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى