مسابقة الشعر العامى

بادعى يابنى..مسابقة الشعر العامى.بقلم أميمة سلطان مصر

أميمة محمد علي
(أميمة سلطان )
https://www.facebook.com/malek.alex.16?fref=ufi
قصيدة عامية بعنوان
بادعي يابني.

بادعي يابني
تبقى أعلا الناس مراتب
بادعي تكبر ف المناصب
لمّا تبقى ف أعلا حتّه
بس خايفه العمر لمّا
مني يخلص حتّه حتّه
تقسى ع البدن الضعيف
خايفه من وقت الخريف
ما التقيش حضنك يساعني
زي حضني ما كان يساعك
خايفه اتسنّد دراعك
ما التقيش عكّاز يشيلني
واتعتر مع كل خطوّه
خايفه تلقى الدنيا حلوه
تجري فيها وتنسى أمك
تنسى دا القلب اللي ياما
شال ف عز الهم همّك
تنسى لحمك
تنسى دمّك
وانت فوق كرسي المناصب
خايفه ييجي اليوم تحاسب
ع الفاتوره لمّا تلقى
الخريف ف ميعاده جالك
رد دين على إيد عيالك
يعني خوفي مش عشاني
خوفي يابني أكيد عشانك
بادعي يعلا كتير مكانك
وادعي تبقى البَار بيّا
نفسي تبقى قصاد عينيّا
أحلا شئ شوفته ف حياتي
يابن قلبي تكون يوماتي
جنبي تتبارك بقربي
رح تلاقي البركه يابني
لمّا تجمع كل دعوّه
من دعا القلب اللي شالك
بركه ح تشوفها ف عيالك
لمّا يجري العمر منك
يومها تعرف إن أمّك
هيّ أكتر حد حبّك
يومها بس ح تلقى قلبك
قام يرتّل آيه آيه
من آيات الرحمه ليّا.

بقلم: اميمة سلطان

الوسوم

همسه

همسة هى مجلة كل الناس وكل الأعمار . المهنية والصدق شعارنا .ننقل الخبر من مصدره الحقيقى ونسعى دوما للتجديد من أجل القارئ

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

إغلاق