ط
مسابقة الشعر العامى

قصيدة : مابنحبكش .مسابقة الشعر العامى بقلم / محمود السيد محمود عبد الوهاب

الإسم / محمود السيد محمود عبد الوهاب

الشهرة / محمود السيد

الدولة / مصر

المحافظة / القاهرة

للتواصل / ( فون – واتس اب ) 01001061110

رابط صفحتي على الفيس بوك ..

الفئة / شعر عامية
إسم القصيدة ” ما بتحبكش “
” مابتحبكش “

وعهد الله ما بتحبك ..

فـ لملم شوقك السارح

ورا طيفها في كل مكان

وفوق من وهمك الواضح

وصحصح عقلك الغفلان

وعَوَّد قلبك القسوة

وعَلّم روحك النسيان

وعيش بكرامة أحسن لك

وأيه جابرك ..

تعيش وياها بإرادتك رخيص متهان .

قِبلت تعيش في حالة بتشبه الهذيان

عشان واحدة مابتحسكش

وليه ما اعرفش !

وافقت تحب إنسانة ما بتحبكش

وتسهر كل يوم لِيلك تِسح دموع

وتبكي بِحُرقة كالأطفال بصوت مسموع

وتتمنى تكون شايفاك

وِلو حتى تكون حاسّاك

عشقت شيطانة مـ الآخر

ومن خيبتك فاكرها ملاك .

كتبت الشعر في عينيها شهور وايام

وقلت مَافيش حبيب غيرها سنين قُدام

عملت جنابها محرابك

وخليتها تصلي إمام .

وكات أصلا ماتنفعلكش

ولا كان توبها من توبك

دي ليها ف كل ساعة حبيب

وكات عاملاك يادوب واحد

شبه غيرك من المحاسيب

وبِِتبَدل كمان فيكم

وعاملاكم كما المراكيب .

يا راجل عيب !

ماتستلوحش .. ماتتسوحش

ماتتمسحش .. ماتتشعلقش

وتمسك حبلها الدايب

ولا تكمّلش

فـِ سكة قلبها المهجور

فضلت كتير تعمَّر أرض خربانة

وفـِ الآخر بتطلع بور

حافظت كتير على عهودك

وهيَّ باعت لك الأوهام في شكل قصور .

حِلفت لها

تصون العشرة وتصونها

وحلفت هي لَ تبيعك

وتفضح سرك المستور

فـَ لمّ الدور .. وسيبها تغور

دي واحدة في الأساس خاينة

وكات باينه ..

ولكن قلبك الطيب عشان طيب مابيصدقش

ولا بيعرفش من خيبته

ولا يفرَّقش من طيبته

ما بين الضلمه أحياناً وبين النور .

و رحت تحب إنسانة ماتشبهلكش

ورغم دا كله حبيتها

وهي في الأساس كارهاك مابتحبكش ..

وعهد الله مابتحبك .

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى