رسمتك خريطه لكل البلاد
فيكى ديانا وجوليا وسعاد
وأنا معاكى أنا السندباد
أنا فارس وجورج واياد
ــــــــــــــــــــــــــــــــــــ
لافيها حدود ولا جنسيات
ولا فرق فيها بين ألونات
ولغه واحده مفيش لغات
ولا فيها فقرا وولاد ذوات
ـــــــــــــــــــــــــــــــــــ
بلف فيها كل الموانى
وباسمع فيها كل الغناوى
ويتقال فيها كل الحكاوى
والأرض تطرح كل التقاوى
ــــــــــــــــــــــــــــــــــ
الحق فيها صوته عالى
والكل عمى والكل خالى
وأحلى مافيها سهر الليالى
والحب فيها فوق فى العلالى
ـــــــــــــــــــــــــــــــ
الكل بيقرا ويسمع ويفهم
والرأى فيها يبنى مايهدم
تقدر تخالف من غير ماتشتم
وتتكلم من غير ماتظلم
ـــــــــــــــــــــــــــــــــــ
الكل فيها من حقه ياكل
لافرق فيها بين ست وراجل
والكل فيها شغال وشايل
الكل فيها بيتسمى عامل
ـــــــــــــــــــــــــــــــ
الكل عارف واجبه وحقوقه
ومافيش حد يقدر يسوقه
الكل فيها عارف طريقه
ولاحد يقدر يمنعه ويعيقه
ــــــــــــــــــــــــــــــــــــ
تشتغل فيها اللى انت رايده
والعلم كمان شعلته قايده
ولاحد يقول مفيش فايده
خريطه فى الخيال زايده
ــــــــــــــــــــــــــــــــــــــ
حلم واتمنيه يكون بكره
ويصبح فى القلوب فكره
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
