الرئيسية » مسابقة الشعر العامى » تحديد مسار. مسابقة الشعر العامى بقلم / محمد محمد الباز .مصر

تحديد مسار. مسابقة الشعر العامى بقلم / محمد محمد الباز .مصر


مسابقة مهرجان همسة الأدبية الكبري
فئة شعر العامية
محمدمحمدالباز
01016774507
قصيدة …تحديد مسار

تعديل مسار العمر
خط ماشي ف مبتداه
جناين راويها العشق..ولسة مفرعتش
جوة زنازين الحياه…قلوب بترفض تلتقي
كان العتب نهر سايل..ع الضلوع
لما ولعت الشموع….إنطفي ضي الأماكن ف مهدها
سعيت أبروز الأحداث…تساعدني الأماني بالأمل
كان ردها…إكسر سكاتك ياجبل.
صعب الكلام …يوصف معاني تحسها
خطوط عرضك…ف الحياه…إحسب تفاصيل جوها
تلقي نتيجة عمرك يشبه البرد ف يناير
جوك مغاير
لكل تفاصيل السنة…..تلبس تقيل….تمشي ضرير
هو المصير…لحظة خروج الأه من بوح الصور
قد تعتبر….قد تعتذر
إنك عديم الروح….ف حس المعطيات
ترفض تبوح….تخرج أهات
يكبر معاك إحساس الذنب للسما
مش مظلمة
المعضلة….إنك تسيب أوهامك …تسحب خيوط حلمك …تفرطه
فتلملمه…يصبح. ف ايدك. لعبكة
هي الحياه….معادلة قابلة للزوال
مابين حرام وبين حلال
تايهة العقول …..ف المنتصف
بس أعترف
إن الجميل…..ف وصفها
إن كل شيء متاح
ف البراح…..ألقي السماح
جوة الزقق جراب ماليه الهمهة
تعديل مسار
لما القرار….ينبع من ذات حضرتك
تطرح همومك م الوجع
تقسم سكاتك ع المشاع
تساوي فرحك ع الورق
تجمع شتاتك ويا اللي باع
تبقي النتيجة مقلمة
تفرد حنينك ف الشمال
تأخد بإيدك لليمين
ترفع دراعك للسما
تكتب ف صفحة…الألم
تعديل مسار
تضرب عيار
ع اللي كتف ضحكتك
كان الوجع….لما إحتضر
نداه حنين الذكريات
يدفن معاه أصعب قرار
غمة وأهات…حلو السكات
لما تحس الإنتصار
تفرد ضلوعك للهوا …ترسم بريشتك. ع النجوم
ضي القمر….
صعب إنه يختفي
فا تحتفي….إنك صبور
تصبر تنول….تقدر تقول
ضلمة ……ونور
هتعيش…وانت منتشي

#محمدالباز

تعليقات

تعليقات

عن همسه

همسة هى مجلة كل الناس وكل الأعمار . المهنية والصدق شعارنا .ننقل الخبر من مصدره الحقيقى ونسعى دوما للتجديد من أجل القارئ

شاهد أيضاً

أنا السلطان . مسابقة الشعر العامى بقلم / إسلام سيد احمد . مصر

الاسم /اسلام سيد احمد اللقب / اسلام الديب السن /28 سنة البلد / مصر فئة …

4 تعليقات

  1. رضا أبو الغيط

    خاص بالمسابقه
    الاسم رضا أبو الغيط – مصر
    ٠١١١٠٦٣٠٢٤١
    فوق الأفيش
    **********
    فوق الأفيش
    صورة غلام شايل حجر
    حواليه ف منظر مضطرب
    كام بنت تشبه للقمر
    متكحلين
    من لون سمار
    شبر التراب اللي اتنهب
    متكبلين
    بقيود حديد زى العبيد
    من تحتهم …مليون لهب
    متنطورين
    فوق التراب.. والأرصفه
    جنب اللي باقي
    من بواقي الأرغفه
    من فعل بركان الغضب
    وكمان تلاحظ ع الأفيش
    بركه دموع
    وعيون بتنزف دمها
    كيف المطر
    والصوره فوق كل الحيطان
    داخل قلوب كل البشر
    والكل قاعد ينتظر
    مشهد رهيب
    راح يتولد
    داخل عيون
    كام قلب محروم م النظر
    العرض قرب يبتدى
    والصاله كامله كومبليت
    والصيف ده عاشق للسهر
    فتحوا الستار
    علي نار بتحرق ف المبيت
    مع كام جريح جنب الضريح
    اللي امتلا بالميتين
    مشهد مميت
    بكي العيون الدبلانين
    من كتر اسراب الوجع
    وهموم كتير فوق الكتاف
    وحلوق بتشكي من الجفاف
    ومعاها أوراق الشجر
    وهكذا بدأ الحوار
    بين اللي قاعد يرتقب
    سيدنا المسيح المنتظر
    او حتي صوت
    يشجب ..يدين كل الشغب
    وعيون حزين
    بتطل
    من خرم الستاره المنهكه
    من عرض أشبه بالعجب
    مكتوب بدم اللي انحني
    وقت الخريف
    بعزم جامد ما انكسر
    بيقول لكل الموجدين
    انا لسه موجود ع الحدود
    حامي حما ارض الجدود
    وف ايدى شايل كام حجر
    وانا الوحيد اللي انحرق
    واللي انسرق
    وبيوجعه
    صوت الغلابه المطحونين
    داخل حدود المملكه
    بيقول لكل الموجودين
    انا ابن كل
    المسجونين في أرضهم
    انا ابن كل
    المطعونين في عرضهم
    وانا اللي دايما بااترسم
    لطمه علي خدود العرب
    سقف جميع الموجودين
    علي خدهم
    والدم فار
    ف عروق جميع اللي اشتري
    كام تذكره
    لأجل ما تنزل دمعته
    ويشوف ف فصول المجزره
    وبسرعة البرق انتفض
    كل الحضور
    و لقيت صورهم ع الأفيش
    بتقول نموت
    لأجل البلد واللي اتولد
    يقدر يعيش
    والعرض لسه ف أوله
    ولكني قاصد اختصر
    لأني خايف…. ع القلم
    من كتر أوجاع الألم
    يسقط شهيد ..أوينكسر

    ********************
    رضا ابو الغيط

  2. هناء ابراهيم حواس

    قطر الغلابه …
    قطر الغلابه الطيبين
    علي نفس قضبان الوجع
    شايل هموم الموجوعين
    وذكريات من فرحهم
    وهما لسه صغيرين
    ماشي يهدهد حلمهم
    علي قدهم من صبرهم
    يارب عين
    بس في لحظه القدر
    لحظة خطر
    القطر تاه عن سكته
    شاف دنيته من غير عنين
    وكل ناسه الطيبين
    صرخوا معاه صرخة حياه
    بكت العيون كل العيون
    حفرت دموعهم سكتين
    سكة رحيل من غير رجوع
    سكة رجوع من غير حنين
    اه يا أنين الطيبين
    اه يا أنين الطيبين

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *