الشعر والأدب

تعظيم سلام ..!! إلي_ملاكي_الحائر قصيدة بالعامية للشاعر د. خيرى السلكاوى

بالعامية الى ملاكي الحائر التي تستسيغها 


..

—–د. خيري السلكاوي
..
اخر ماعندي كلمتين
** 
انت فييييييييين..!!
**
قلبي اللي عاش 
يبني مداين حبنا
في كل عين 
ويهد ف السور اللي كان 
مابينا فارق سكتين
عايز يشوفك 
كل ثانية مرتين 
ويسمعك 
وتدلعيه ويدلعك
والفرحة تبقى فرحتين 
والسكة تبقى 
سكة واحدة ف عشقنا
مش سكتين
..
 
دلوقتي بعد السكتين 
ما اتوحدوا
ينفع اقولك يا حبيبتي 
انت فييييين !!
ينفع تكون السكة تااااني
سكتين ..!!
..
الدنيا سيل 
لو خد جميع العاشقين 
في سكته من شدته 
ييجي لحد العشق فينا وينتهي
وكفاية انه اتلخبطت 
وياه حياتنا مرتين
..
الحب ياست النسا 
مش بس عين بتحب عين 
الحب بنا ومسطرين
بيرص طوبة جنب طوبة
من دهب
و اما يكمل قصرنا 
عشق وبنا
يدينا مفتاحه الوحيد 
مش مفتاحين
..
الحب مش عصفور وطار 
الحب بحر مالوش قرار
الحب زرعة بتتروي
من شهدنا
مع كل طلعة شمس فينا
تزيد خضار
..
والحب نااااار
من غير لهب 
مابتنطفيش بالغيرة 
وب شغل الصغار
فيها ايه بقى
لو كانت الغيرة مابينا
تبقى دايما حبة حبة 
انت عارفة اني راجل مجتمع 
وعيون بهية 
كل ما تشوفني تبوسني 
بس بوس ود ومحبة 
صدقيني 
اني عمري ف يوم ما خنتك 
يبقى ليه دايما ياروحي
تعملي م الحبة قبة 
كل كلمة حلوة منك قولتهالي
عايشة فيا من زمان
بس كلمة واحدة مني اسمعيها 
لما نار الغيرة تحمي 
ابعتيلي يا حبيبتي 
استخبا 
..
الحب عمره ماكان
هزيمة وانتصار 
الحب نار ف القلب
يطفيها التسامح والوصال
وانا يا حبيبتي قلبي حبك
ف الخيال 
والدنيا قالتلي محال
إني التقيكي
لكن مع الصدفة الجميلة
كملت بيكي 
..
الحب فجر بينمحي
بعده الضلام
والطير يشقشق والندى
فوق الورود 
يغسل مابين قلبين خصام
الحب هو الاهتمام 
والسلام 
الحب افعال مش كلام 
الحب له مني ومنك 
ياملاك تعظيم سلام 
تعظيم سلام 
تعظيم سلام 

..

الوسوم

همسه

همسة هى مجلة كل الناس وكل الأعمار . المهنية والصدق شعارنا .ننقل الخبر من مصدره الحقيقى ونسعى دوما للتجديد من أجل القارئ

مقالات ذات صلة

تعليق واحد

  1. تعظيم سلام :-
    =========
    تعظيم سلام
    على شاعر الحب الحقيقي
    ما فيش كلام
    اللي قال
    (آخر ما عندي كلمتين
    أنت فييييين ؟؟ )
    سؤال عن الحب
    اللي باقي من سنين
    من الزمن الجميل
    اللي كان فيه الحنين
    هو اللي غالب في الطباع
    بين البشر رغم الأنين
    وكنت فاكر لك
    من الأشعار فصيح
    لكن !!
    صدقوا اللي قالوا قبلنا
    كتكوت غرامك
    في الهوى دايماً يصيح
    وبكل عشاق الغرام
    حرفك يطيح
    يا أبو حرف جمع
    في المداين سكتين
    في طريق غرام
    يا أبو قلب وحّد
    في الهوى نبض الأذين
    وطبيب وعارف
    دقة القلب بروحين
    ما بين أذين وبين بطين
    يا مجمع العشق الإلهي
    في قلب واحد
    ومخلى فرحة
    قلب واحد فرحتين
    يا أبو قلب خيري في الهوى
    وكمان أمين
    يا أبو كلمة صادقة في الهوى
    (الحب يا ست النسا
    مش بس عين بتحب عين )
    الحب بينا شيء عجيب
    الحب قصر من الدهب
    مبنى على أصول الهوى
    يقاوم الريح العتيدة
    ولا عمرة منها يوم هوى
    الحب صوت العود
    مع الناي الحزين
    وكمان أمين !
    الحب بحر من الحنان
    موجة أمان
    والشط شوق
    مغزول بطوق
    يحمى شراعنا
    من شرور الحاسدين
    الحب طير ومالوش حدود
    عن عشه دايماً في الهوى
    يقدر يزود
    حاضن هواة تحت جناحين
    الحب زرعه تزيد خضار
    مع شمس طالعة
    تشق في الضلمة النهار
    الحب خلى كل حبة رمل
    في قلب الصحارى صبحت عمار
    الحب جنة
    الحب نار
    ( الحب عمرة ما كان
    هزيمة ولا انتصار )
    الحب في الآخر فرار
    بين قلب واحد له روحين
    وسكة الأحباب
    في درب العاشقين
    ودي كات رسالتي لك
    يا أبو قلب خيري في الهوى
    وكمان أمين
    الحب كان آخر وكان أول كلام
    الحب دايماً اهتمام
    الحب من قلبي الفقير
    لقلب شاعرنا الهمام
    أجمل تحية أجمل سلام
    وتحيتي الرسمية لك
    بصفتي ضابط من زمان
    تعظيم سلام
    .
    #على_مصطفى؛
    15 / 7 / 2018 م
    .
    .
    .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.

إغلاق