الرئيسية » الشعر والأدب » جنب الحيط ..مسابقة شعر العامية ..بقلم / إيمان سامح من مصر

جنب الحيط ..مسابقة شعر العامية ..بقلم / إيمان سامح من مصر

قصيدة (جنب الحيط)
كلمات / ايمان سامح
جمهورية مصر العربية
لمشاركة في مسابقة شعر العامية
****************
جنب الحيط
*******
شد لحاف الدنيا… ونام !
وان حسيت إنك بردان
عشش جوا شقوق أوهام
يمكن تقدر تنعس تحلم
إنك حاكم او سلطان
إحلم انك ملك البورصه
والأسهم ملكك ياسلام
تعلى وتوطى بإيدك إنت
وتحدد مين الخسران.
وﻻ أقولك إحلم إنك
جوا كازينو الحب بتلعب
عكس العجله تلف الكوره
مرساها دايما أموره
إيه راح ينفع علشان مين؟
العب دايما ع الربحان
بس أقولك إوعى يغرك
حلمك مره و يجى يضلك
تحلم يوم إنك فرحان
أصل الفرح خلاص طحنوه
بالنيه السوده..وخبزوه
لجل مايبقى رغيف. أضحيه
ياكله ويشبع ملك الجان
إوعى تقول إنك زعلان
أنا هاديك ف إيديك عنوان
بيت الست سعاده تدور
زى ماهوا واﻻ إتغير؟!!!!
ناس ادّونى زمان عنوانها
قالوا عنها فتش .. دور
من يومها ماشى و محتار
بسأل أى بيبان تقابلنى
حدش شاف واحد متهنى
علشان أسال ناسه و أهله
يمكن يطلعوا ليها جيران.
شد لحاف الدنيا كمان
غطى ودانك ويا عينيك
إوعاك تحلم أو تتمطع
أو تطلع من بره إيديك
أصل البرد شديد ع الجته
إسال عنه أهل الحته
تحت لحافك يلّا. إتكعور
والزق دايما جنب الحيط
إوعاك حتى ف يوم تتقلب
أحسن تقلق أهل البيت
خلى لحافك ليك سجان
عايز إيه تانى من الدنيا..؟
ناسك كمل أهل طيابه
حبه تعالب حبه ديابه
على كام واحد م النسانيس
إتشقلب بقى يللا وهيص
الأسد أهو نايم …نعسان
شد لحافه الفرو عليه
خليه يغرق فى اﻻحلام
وإنت لحاف الدنيا كفايه
حتى ولو كانلك دفايه.
تقدر تنعس وإنت جعان؟

تعليقات

تعليقات

عن همسه

همسة هى مجلة كل الناس وكل الأعمار . المهنية والصدق شعارنا .ننقل الخبر من مصدره الحقيقى ونسعى دوما للتجديد من أجل القارئ

شاهد أيضاً

صوب الجمال .قصيدة للشاعرة / نرجس عمران . سوريا

صوب الجمال لنجعل الأحلام مشرأبة كل العطايا دلال لنعمر الحياة محبة في الورد بعض الاكتمال …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *