ط
الشعر والأدب

حالة وجع. قصيدة للشاعر / جلمى قاسم


“حالة وجع”

***********************

مع خيط الدمع النازل من خدك

غِرقِت يدك

ولا عَدشِ المناديل بتساعُه

والمُر الطافح فوق أرضك

دَبّل وردك

وإتغير فى شـــــــذاه وطباعه

عَصفور الفرحه هَجر عِشك

مابقتشِ الضحكه تزور وشك

بتهشك أول ما تشـــــــــوفك

فى كفوفك تفاصيل لظروفك

مسجونه الآهه ف بير جوفك

مـــن خوفك سكتت حكاويك

فى عنيك الأحلام مكسوره

والهم بيرسم ع القــــــــــوره

أحوالك وعــــــذاب لياليك

مُش عارف يومك من أمسك

أيامـــك تشبه بعضيهــــا

ونهارك مش شايف شمسك

ولا قمــــرك شقِت لياليهـــا

بتبات متونس بجروحك

والوجع الطابق على روحك

بيخلي مشاعرك بتشيب

بتعيب ع الدنيا وأحــــوالها

وبتمسح بلاويك مع شالها

إكمنك مـــــش لاقى حَبيب

مافضلش فى جسمك كام كيلو

للـــــوحده بتنهش وتشيلو

مع صوت مواويلك بتغيب

وبترجع تانى مـــــن الأول

وتعيش مـــع لحن التغريب
**********************
قلم/ حلمى قاسم

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى