مسابقة الشعر العامى

حتتك بتتك .مسابقة الشعر العامى بقلم / أحمد عطا عباس من مصر

مسابقة شعر العامية
قصيدة : حتتك بتتك
بقلم : أحمد عطا عباس
مصر / مطروح / باب البحر ش علم الروم
01017408014
Al3ata2tours@gmail.com
_____________________

حَتَتَكْ بَتَتَكْ
ــــــــــــــ
حَتَتَك بَتَتَكْ . حَلَّق حوش
تارالام بارالام في الفَنكوش
واللهْ الفَرق كبير أوي بين
لِبس محَزَّق والطَربوش
بَدَل الكوز . بقا عندنا دُش
فُوتنا الراديو وجيبنا الدِّش
عَيِّل عنده 6 سنين
بيوَلَّع بانجو وبيرُش
.
لأ والأكل فيليه وبانيه
سوشي وموشي ومعرفش ايه
تدخل مطعم مبتفهمش
تاكل إيه أحيه أحيه
.
لأ وحماده فـ تانيه اعدادي
قالوعاملي جروب عَ النِت
عايش قصة حب كبيره
سهران طول الليل ع التِت
والأي باد بَدل البلونه
والأي بوت لعبه صغنونه
الله يرحم لعب زماااان
كُنَّا بنإزح م البلكونه
.
لأ والأصعب من كدا إيه
عمِّي حجازي اسمالله عليه
شادد وصلت نِت ودِش
قالب بيته حجازي كافيه
باع البقره وجاب توك توك
عامل صفحه على الفيس بوك
حاطط صورته على البروفيل
نافخ صدره تقولش الروك !!!
كل يومين وحجازي يجيب
من ع النت موبايل بِت
حتى لسانه بقا معوووج
نُص كلامه نوت وشِت
عمي حجازي اتجنن خالص
بيقول هَيفا احسن م السِت
راحِت هيبة عمي حجازي
بعد ما لبس الشورت وكَت
.
شوفت على الكورنيش امبارح
واحد واقف بيبيع تين
باسأله شَغَّال إيه يا أخينا ؟
قال لي يافندي مدرس دين
واحنا بنرغي عَدَّى علينا
باشا بعربيه ليموزين
قولتله شوفت ابن المحظوظه
قال لي يا عم . دا مسيو أمين
بردو مدرس زَيي تمام
بس شابِطلُه فـ مجموعتين
أصله يا سيدي بيدِّ فرِنسي
والطلاب عايزه درجتين
قولتله طيب . إعمل زَيُّه
وادي دروس . تِركب عربيه
بَدل المرمطه ع الكورنيش
وانسى بقا الفول والطعميه
ضِحك الراجل . من غير نِفس
قال لي يا بيه أصل الموضوع
مين فـ الدين راح ياخد دَرس
طول ما الدين بَرَّا المجموع
يا زَمَن
يا زمن ماشي . المعكوس
أي أوَنطَه تلِم فلوس
تعمل نَفسَك صاحب مبدأ
تِفضل حتى تموت موكوس
حَتَتَك بَتَتَك حَلَّق حوش
تارالام بارالام في الفنكوش
واللهْ الفرق كبير أوي بين
لِبس محَزَّق والطربوش

الوسوم

همسه

همسة هى مجلة كل الناس وكل الأعمار . المهنية والصدق شعارنا .ننقل الخبر من مصدره الحقيقى ونسعى دوما للتجديد من أجل القارئ

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

إغلاق