مسابقة الشعر العامى

حدا الساقية ..مسابقة الشعر العامى بقلم / محمد ابو العبادى من مصر

خاص بالمسابقة ……… شعر العامية

حدا الساقية
………….
الكل عاود ف الأجازه
وانت لأ
مع إن أمك
من بداية النور ما شق
خبزتلك العيش
اللي كنت بتعشقه
دبحتلك البطّه السمينه تقوّتك
يا عريس وحانت فرحتك
قاعده عروستك
ف انتظارك يا ولد
والكل قاعد
لجل يحضر زفّتك
الكل عاود ف الأجازه
وانت لأ
مع إن أمك من ساعات
راحت حدا الساقيه
تشوفك ع الطريق
وقف القريب جنب الصديق
وعروستك اللي ايديها ف الحنه
هي كمان مستنظراك
وف قلبها الحلم البرئ
طب ليه ما جيتشي ف الميعاد ؟
مع إن شوفت الكل عاد
إيه أخّرك عن زفّتك
أو عن خبيز أمك يا واد ؟
يا صقر قاعد ع الحدود
لا كان هجوم للدبابات
ولا كنّا بنحارب يهود
ولا حتى سكّة رجعتك
كان فيها مزروع البارود
إيه أخرك ؟
دا احنا هنا مستنيين
يا ضنايا قوللي روحت فين ؟
وليه صحابك حزنانين ؟
مع إن واقف ع الشمال
صفّين ملايكه بيضحكوا
والحور على الجنب اليمين
ف عرفت إنك جيت عشان
زفّة إله العالمين
بس اللي ضيّع فرحتي
موتك ما كانش بإيد عدو
دا أخوك وغيّر مذهبه
وارتاح ف حضن المجرمين
ما فهمش إيه معنى الوطن
ولا إيه يكونوا المسلمين
إنت اللي عايش هو مات
ملعون ف كل كتاب ودين
صدقني يا أطيب ولد
كل اللي خانك ميتين
إنت اللي عايش ف السما
ف الجنه طاير بجناحين
والأرض دمّك رح يكون
كما طير حمام
رفرف ما بين القبلتين
الكل عاود ف الأجازه
وانت لأ
علشان مافيش أبدا ملاك
بيعيش ..
ف دنيا الشياطين
…………………………….
محمد ابو العبادى

تعليقات

تعليقات

الوسوم

همسه

همسة هى مجلة كل الناس وكل الأعمار . المهنية والصدق شعارنا .ننقل الخبر من مصدره الحقيقى ونسعى دوما للتجديد من أجل القارئ

مقالات ذات صلة

‫14 تعليقات

  1. علشان مافيش أبدا ملاك
    بيعيش ..
    ف دنيا الشياطين…… نعم استاذ ى الفاضل احساس عالى جدا بالكلمة وتطابق فى المعانى ونغم فى حروف الكلام …. تحياتى شاعر مصر والوطن العربى

  2. علشان مافيش أبدا ملاك
    بيعيش ..
    ف دنيا الشياطين
    فعلا … مفيش ملاك بيعيش في دنيا الشياطين.. لكن الشياطين يزعجون الملائكة ..ومازالوا يريدون تسميم حياتنا يا صديقي وشاعرنا الرائع .. تسلم حروفك وكلماتك يا غالي

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق