ط
مسابقة الشعر العامى

حدوتة ملتوتة.مسابقة الشعر العاى بقلم / أحمد عبد اللطيف عبد الرازق النجار

الإسم/ أحمد عبد اللطيف عبد الرازق النجار
الدوله/ مصر
موبايل +واتس/ 01020024942
نوع المشاركه/ شعر عامي
أسم القصيده/ حدوته ملتوته
👇👇
أنا بنوته ..
من كتر الوجع إللي ماليني
بحس حياتي حدوته
بحس العمر بيعدى، وبيودي ..
البنت لدينا مكبوته
ولا بنطق ولا بتكلم
وبستحمل وبتألم
أتارى مصيري جرح × ضعف
وحبة ظلم ع النوته
وكام لطمه علي الماشي
وكام خبطه علي رأسي
وأنا كأني مربوطه
أتارى حياتي مش ليا
وحدوتتي برضو منهيه
ويمكن حدوته ملتوته
ويمكن قصه محطوطه
يدوب ع الرف
وكل قصص البنات ف نفس الصف
ماليها تراب ف صفحاتها
ومن كتر ياعيني ركنتها
مبقاش ليها لزوم
وهي ف الحقيقه قصص حيه
قصص عايشه لحد اليوم
هوا أنتوا ليه الأنثي ف نظركوا ..
جسم من غير هدوم ؟!
هوا أنتوا ليه بترموها وتنسوها ..
وفجأة بس تحبوها ف وقت النوم ؟!
هوا أنتوا ليه مش بتحترموا مشاعرها ؟
وف عز ما تبقي بتصونكم وتحفظكم ..
بتبصوا برضو لغيرها ؟!
هوا أنتوا ليه بتنسوها ؟
وف عز ما تبقي شيفاكم حياتها وروحها .. قتلتوها ؟!
هوا أنتوا ليه كسرتوها وبعتوها وخونتوها وسيبتوها ..
ف حاجه لحب ؟
ف حاجه لمشاعر عايزها القلب ؟

أنا بنوته ..
خلقني ربنا وبحس
وبرضو مش كدا وبس
خلقني ربنا من حوا
خلقني وف قلبي من جوا
خلق طيبه
فكان عيبه ..
تنسوا إن أنا أنثي
وتخلوا المجتمع ينسي ..
حقي كمان ف وسطيكم
مرار العيشه دوقناها علي إيديكم
وكان أولي نعيش بيكم
أكيد أنتوا كرهتونا
وفرحتوا لما لقيتونا
بنرضي بحالنا ومنتكلمش
وأنا ف العادى بتكلم ومش خارصه
لكن دايمآ بكون حارصه ..
لأصل كلامي يسبب جرح
فأرجوكم ..
أنا نفسي أدوق الفرح

أنا بنوته ..
عشت من صغرى كأني يتيمه
بعامل نفسي وبنفسي عملتلي قيمه
ضغوط المجتمع ضغطتني
وعاداته المره خنقتني
وكان مصيري أسوء مصير
دا أنا حتي بقالي كتير
بدور ع إللي يسعدني
بدور ع إللي يوعدني ..
نعيش بضمير
لكن طلبي كأنه خيال
ولا بيشغل أساسآ بال
أتارى البنت لو طلبت تعيش ف آمال ..
بتطلب حاجه ممنوعه
هوا أنتوا ليه مستكترين ..
تكون طلباتي مسموعه ؟
هوا أنتوا ليه مستخسرين ..
أعيش ورأسي مرفوعه ؟
هوا أنتوا ليه بتفرحوا ..
لما تلاقوني عايشه وموجوعه ؟
هوا أنتوا ليه قبلتوني أكون زوجه
وقبلتوا أبقي ممزوجه ..
فى أم وست ؟
بخدمكم وأراعيكم وأستيتكم وأهنيكم
وفجأه نسيتوا إن أنا بنت
وفجأه طلعت وعودكوا سراب
بعد م كنت بيها آمنت
فشكرآ كونكو نسيتوني
وشكرآ كونكو سيبتوني ..
جماد عايش ف هيئة بنت

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى