ط
الشعر والأدب

قصيدة : امتى ميزانك يتعدل ؟ . للشاعر / رضا أبو الغيط

امتى ميزانك يتعدل ؟

*****************

الحلوة فاردة شعرها

فوق كتفها

وانا واللي عاشق حسنها

بنقولها

خفي دلالك مش كده

وبلاش نهون

وتهون عليكي الأفئدة

طول عمرنا

كان حلمنا

تلمح عيونا ضحكتك

ويدلنا

كل اللى حصل خطوتك

فين سكتك

طول عمرنا

مستحملين

قطر الدموع فوق خدنا

وجبال هموم علو السحاب

فوق كتفنا

وايدينا دايما م الالم

على قلبنا

ولكننا رغم الجراح المعضلة

متشعبطين

ف خيوط منانا والأمل

يمكن ف يوم قلبك يا غالية

يحسنا

ويداوي لينا جرحنا

ونشوف عيونك مغرمة

تلمح شعاع لون فرحنا

وتقربي بينا الخطاوي الممكنة

والأمكنة تصبح أمان

للي هوى

من فوق جبال حلمه الغريب

ف زمان عجيب

طول عمره واكل حقنا

ف زمان بيمنح للي باع

حق اللجوء للأضرحة

وف وشنا

أشهر جميع الأسلحة

يا مفرحة ……

كل اللى خانك وارتمى

جوة زعابيب الفتن

امتى ميزانك يتعدل ؟

ويعود لنا

من تاني أبسط حقنا

جوة الميدان اللي ارتوى من دمنا

*****************

رضا أبو الغيط

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى