الرئيسية » الشعر والأدب » حكاية حارتنا..قصيدة للشاعر / أحمد الصارم

حكاية حارتنا..قصيدة للشاعر / أحمد الصارم

حكاية حارتنا

قديمة حيطانها..ودايبة بيبانها
خشبها بياخدك لريحة زمان
هواها المدلع..طبيخه يجوع
وتمشي في حارتنا تحس بامان
وعمك مجاهد..بيصحي يناهد
مع ابنه محمد وبنته هيام
عشان الدراسة..وينزل بطاسة
يجيب الفطار ويرجع ينام
ومجدي المنجد..بيرزع ويهبد
يخيط مراتب ويعمل لحاف
وحبة عيال..معاهم حبال
ورابطنلي قطة بتشكي الجفاف
وبياع طماطم..ينادي ياهانم
نقاوه بمزاجك وشوفي الميزان
ومية غسيل…تنقط بسيل
تصوت عواطف ف وش الجيران
وكسر ياباشا..بنعمل نقاشة
في شقة جارتنا مدام اعتدال
وكشري العدالة..يجيبلك كمالة
وشطة ودقة تموت يا خال
وطرب وكفتة..ماتديني حتة
ومخمخ ونقنق ف ربع الكباب
وعربيه راكنه..وهيصة وحنة
ودوقوا المزاهر ورقص الشباب
حكايه حارتنا..بترسم صورتنا
تقول البلد دي مالهاش مثيل
ولا برج بيزا..ولا اغلي فيزا
كفاية عليا ف حضنك يانيل
احمد الصارم

تعليقات

تعليقات

عن همسه

فتحى الحصرى صحفى فنى ومصور فوتوغرافى محترف ..الصورة عندى هى موضوع متفرد قائم بذاته والكلمة هى شرف الكاتب هكذا تعلمت من اساتذتى فشكرا لكل من تعلمت منهم

شاهد أيضاً

مياه مقدسة ..قصيدة للشاعر / محمد ماجد دحلان ( شاعر الصومعة) فلسطين

قصيدة (((مياه مقدسة !!!))) مياه على شفاه الطير قصيدة لا تفقد انوثتها ليل يطوي صفحاته …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *