الرئيسية » مسابقة الشعر العامى » داخل حدود الشرنقة ..مسابقة الشعر العامى بقلم / رضا ابو الغيط من مصر

داخل حدود الشرنقة ..مسابقة الشعر العامى بقلم / رضا ابو الغيط من مصر

خاص بالمسابقه
داخل حدود الشرنقه
كلمات / رضا أبو الغيط
*******************
داخل حدود الشرنقه
مكتوب لنا دايما نعيش
بين الحصار ويا دمار
وف ضلمه ما تعرف نهار
مكتوب لنا دايما نعيش
وف حلقنا طعم المرار
من غير جناح أو حتى ريش
داخل حدود الشرنقه
مكتوب علينا الانكسار
والحلم عايش ف انتظار
لحظة مخاض الأورده
وميلاد شواشى الازدهار
لحظة شعور الأفئده
بهلال أوان الانتصار
والحلم من كتر الوجع
فتل بقايا عُمرنا
حبله اللى مجدول بالأمل
وف أخره خطاف النجاه
من خوفه من لحظة فزع
وبقوة الدفع الرباعى
للعذاب
فوق السراب
حدف بحبله اللى انفتل
لحظة أمل
فوق السحاب
يمكن ف مره ينشبك
مع طوق نجاه
سابح مع نجوم السما
جنب القمر وسط الحياه
يمكن نلاقى شمسنا
جايبه النهار على كفها
ومن فرحها
جايه على شط اللقا
متبسمه
وف ايدها شايله م الفًرًح
حلم وطرح
لعقولنا كل الأوسمه
يمكن نلاقى شمسنا
جايه بتدحرج ورا
أحلام و تاهت مننا
خلف الضباب والأكمنه
تحدف شعاعها من جديد
وبقوة العزم الحديد
تضرب جدار الشرنقه
تكسر بنورها طوق حديد
وتفك من فوق الرقاب
كل القيود.. و المشنقه
يمكن نشوف حلمى اليتيم
يرجع يعيش وسط البشر
وم الأمانى يرتوى
يطرح شجر يطرح فروع
من كل صنف و كل نوع
وكل فرع أشوف عليه
طير السعاده والأمل
بجناح وريش
وساعتها بس أكيد ها أحس
انى با أعيش
خارج حدود الشرنقه
خارج حدود
كل الزوايا الضيقه

تعليقات

تعليقات

عن همسه

همسة هى مجلة كل الناس وكل الأعمار . المهنية والصدق شعارنا .ننقل الخبر من مصدره الحقيقى ونسعى دوما للتجديد من أجل القارئ

شاهد أيضاً

رسالة من الغربة,مسابقة الشعر العامى,بقلم/صابر فرج ياسين على .مصر

مسابقة الشعر العامي الأسم صابر فرج ياسين على ( جمهورية مصر العربية ) { 01117311278 …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *