قلبي يا دكان مالوش عنوان
متباعه سنين عمره على النوته
فارش رفوف الغربة بالأحلام
عارض فى باترينة روحه حدوته
بابه علي الشارع
مالوش يافطة
تحت بالكونه فيها بنوته
بتلاغي واد ورا شباك
حبال غسيله ممدودة على السكة
تشد رجل كل الناس على عتابه
طابور بالدور
مالوش أول ولا آخر
عايزين الحلم فى القرطاس
ميزانه
قديم ماهوش حساس
كفوفه
ناقصه كام صابع
صوابعه
ناسيها فى الجامع
على شماعه فى الميضة
بيقولوا .. خطأ شايع
كاتبينه الناس على الحيطة
عيالنا دمهم عادة
زي القعدة ع القهوة
مفيش فى القهوة غير الناس
وشوش قهوة
لا مظبوطة ولا زيادة
فلئم من سواد الليل
فى كوباية نهار مكسور
وحتة من بياض كفنه
فـ دمعه سخنة من عينه
وقلبها فى دماغ الناس
وغمس فيها بسكوته
وخبا عيونه فى الجورنال
يقرا بكره فى امبارح
ولا صحح ولا غلطة
دقاته صوتها بيزيق
شريانه قديم مالوش مفتاح
زباينه فالحة تتريق
وعاملة نسخة ع المفتاح
ماهيش شايفة من الغربال
فدفعت كاش
عشان تختار ما بين موتة
وبين ……
…….…. موتة
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
