الرئيسية » الشعر والأدب » دوس على دمّي..قصيدة للشاعر / محمد أبو العبادى

دوس على دمّي..قصيدة للشاعر / محمد أبو العبادى

14581428_350641091945429_7087182207476628035_n
……………….
هلل كبّر باسم المولى
ياللي واخدها بجد مقاوله
أنا ولا قوّه معاك ولا حولا
يعني براحتك دوس على دمّي
غمّي عيونك قبل ما تدبح
غمّي وسيب سكينتك تسرح
ياللي سكنت ف نفس المطرح
إدبح بس ياريتك سمّي
اسمع شيخك غيب عقلك
روح ف ضلالُه اللي بيندهلك
إحرق أرضك كفّر أهلك
وامشي وراه وانت المتغمّي
إرفع صوتك أكتر إرفع
حط حريمك وش المدفع
واما تحس الدنيا بتولع

روح لعدوّك قولُّه ياعمي
وارجع تاني ودوس على دمّي
ياللي العقل اتسرسب منّك
وبقيت متمرمغ مع جهلك
إقرا كتاب الله ح يقولك
دمّي وعِرضي ومالي حرام
إوعى لجهل شيوخك إوعى
دول سايبينك ديب وبترعى
إنما هُمّا ف قلب المُتعه
والكافر عاملينه إمام
إصحى قوام ياللي انت ف غفله
توب لله واخرج م الوحله
دول قابضين من تحت الطاوله
أنما سايقينك بلجام
إوعى تعيش بينهم خدّام
ياللي كتاب الله ف يمينك

عندك عقلك عندك عينك
فكّر حتلاقي اللي يدينك
علشان سيبت أخوك مدبوح
إلحق توبه وعود لطريقك
اخرج من كل اللي يسيئك
واتطهّر من دم بريئك
باب التوبه مازال مفتوح
إلحق قبل طلوع الروح
أما ان كان قلبك متغمّي
إدبح بس ياريتك سمّي
ودوس على دمّي
……………………………

محمد ابو العبادى

تعليقات

تعليقات

عن همسه

فتحى الحصرى صحفى فنى ومصور فوتوغرافى محترف ..الصورة عندى هى موضوع متفرد قائم بذاته والكلمة هى شرف الكاتب هكذا تعلمت من اساتذتى فشكرا لكل من تعلمت منهم

شاهد أيضاً

السيسى البطل..خاطرة بقلم / إبراهيم راضى

السيسى يا بطل رجعت لمصر الامن والامان بنحبك يا بطل علشان خلصتنا من حكم الاخوان …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *