خاص بالمسابقة – القصيده العاميه
– الأسم : أسماء سعيد صبحى
– البلد : جمهورية مصر العربية – الإسكندرية
اسم القصيده “رحلة غياب ”
سايق عليك الاوليه والتابعين
عاملى يجى 100 حجاب
إرجع أوام من رحلتك
يكفى غياب
وحشانى جدا ضحكتك
واللمه والاصحاب
ف كل زاويه من زوايا البيت
ذكرى لحبك ويا ريحه قهوتك
كرسيك هناك
جنبه الكتاب
من كام سنه ..
شوف أد ايه كم التراب
سايبه عشان يشهد
عليك ف المحكمه يجمع حساب
بعد الفراق
ليه كل حاجه اتغيرت
فاكر يوميها ف المطار
انا قولتلك اياك تطول ف الغياب
قولت الحكايه بالكتير هيا سنه
واهو فات سنين
والقلب مــلً
داق المر ف كاسات الحنين
فينك بقى فعلا اوى اشتقتلك
تاسع جواب انا ببعته
من شهر فات
من غير ردود
يا هل ترى مبيوصلوش
ولا انت مش موجود
عاشر جواب الشهر دا
بعد التحيه والسلام
قصر الكلام
الدنيا ماشيه عادى جدا ف البلاد
وانا مش تمام
موجوع شويه من الفراق
عم إبراهيم باعت سلام
فاكر يالا عم ابراهيم
بياع خضار روض الفرج !
شغل الوكاله والهرج
فاكر شقاوة السيده
واللمه فوق سطح العماره جنب ابراج الحمام ؟
بنت الجيران
يوماتى تسألنى عليك
وأقول تمام
فاكر ملامح وشها ولا الزمن نساك
مشتاقه ليك باين اوى من زيغ عنيها والكلام
