ط
الشعر والأدب

نجم الأحلام..للشاعر / رفعت السنوسى

رفعت السنوسى
قصيدة ” نجم الأحلام “

…………………………..
باصرخ في الشدة وعز الخوف
واكتبها حروف بِتْرُص كلام
وانطقها قصايد تِهدي أُلُوف
وِتْلِف تِطُوف وِتْرُش سلام
وف وسط الضلمة ولسه باشوف
بأملنا يطوف نجم الأحلام

وإزاى الحلم بيحيي نفوس
والمطره بتولدها سحابه
والضحكة بتمحي ف الف كابوس
والسطر بيحضن في كتابه
وسؤال مولود من بطن نصوص
مولود عشمان يلقى إجابة

ليه ترضى الخطوه المبتوره ؟!
امشيها وكسر أي حدود
ليه تِشْنُق ضِحْكَك في الصورة ؟!
إِحْيِيها ونَوَر أحلى خدود
هتلاقي الجنه المسحوره
وتعدي بروحك أي سدود

ليه حَوارِى الحلم يا ناس تتسد ؟!
ماتسيبوا الحلم وقيدوا بخور
ليه سؤالنا يموت مايشوفش الرد ؟!
وبنرضى جوابه يموت في بحور
ليه بيت الحق في يوم يتهد
ونعيش في متاهة ونطفي النور ؟!

هات بوسه بعشق تِبلّ الريق
واحضن في القلب وعدي حيطان
بالشوق هَنْعَدِي في أي طريق
وقلوعنا تسيب بحر الأحزان
كل المسافات في الكون بِتْضِيق
بالحب تزول كل الجُدران

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى