ط
مسابقة الشعر العامى

سطر واحد . مسابقة الشعر العامى بقلم / محمود كامل محمد عودة .مصر


النص اسمه ( سطر واحد )
اسمى .. محمود كامل محمد عوده
القليوبية – جمهورية مصر العربية

,,,,,,,,,,,,,,,,,,,,,,,,,,,,,,,,,,,,,,,,,,,,,,,,

.. سطر واحد ..
لا سِحر صوت ( رِفْعَتْ ) في نَطِقة المغرب
وزحمة التراويح
ولا فجر حاضر شهوده بقلبي اللي إتعصر مـ النقشبندي في التواشيح
ولا شَدو ( ثومه ) في ( يا ليلة العيد )
وفرحة مراتي بالشال الصوف
وقميص شايلاه في الضَرفه من شهرين
لولا لَسع ( الفولتارين ) وبواخة الغضروف
لا جارتي الجديده العايقه في البناطيل
والضحكه اللي بتدَهنن وداني
ولا حتّة طربوش سيراميك
خَلّا ضرسي ساق العوج
فهاجت بالعند فيَّ كُل اسناني
لا ورثي من ابويا واللي كان يادوب خاتم فضه
شِلْتُه من صُباعه قبل مـ نغَسّل
وسَحّاره ساعة مـ يغضب على أمي تنام عليها
واللي ما كانش فيها
غير صورة أبويا وهو حارم
ومحارم عَمّاتي واخواتي البنات
لا قَعدة ستي وسط البيت
ولا الحواديت
وهي بتخُضْ اللبن وتأكّل الكتاكيت
لا حَبّة الشَّعر اللي هَجّوا من دماغي
مـ القسط اللي ناتف ريشي وجايب داغي
ولا زَكّة رجلي اليمين
من غُرزتين في واقعة المصيف
لا البطاقه اللي إتنَست في البنطلون
وكلمتين الباشا في الكَمين
أبو دم خفيف بيستظرف
لا قَعدة التكعيبه والندوه في باب اللوق
ولا قُرحة المعده اللي كَرّهتني في المسلوق
لا التُلتُميت حاجه اللي بتنُط في دماغي ساعة مـ اصلّي
ولا العُمره اللي طارت بإزازة بيره في استانلي
كل الحاجات دي
وحاجات أكتر بتحصل لي
ماقدروش يخلّوني أكتب اي حاجه جديده
ولا حتى سطر واحد في مُستهل قصيده
أكون عَجّزت وبَقيت رَميم؟!
كارثة.ليكون الوحي لسّه بيجيلي
على البيت القديم !!
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,
محمود كامل محمد عوده

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى