كانت …
برغم البرد عاشقة للمطر
تضحكله لمّا يرش عطره ف وشها
كانت بتفرش ضحكها
حبّة سنابل ف الغيطان
وتنادي ع القلب الجعان
تخبزله م الحب رغيفين
كانت عيونها نجمتين
يهدوا الحيارى ف الطريق
وينوّروا الليل الحزين
كانت ف لمّا الليل يحين
تفرد قناديل الأمان
ع النيل وبين الضفتين
كانت تملّي ع الهرم
واقفه بتتحدى السنين
وتصد إعصار الزمن
ولحد لمّا الريح يلين
كانت بِرِنْجِي وعمرها
ما كانتش يوم بين البينين
ولأنها حضن الأمان
كانت أدان الطيبين
دلوقت وبفعل الجراح
نهرين عيونها اتمددوا
ع الأرض بين القبلتين
…………………………
هناء جــوده
المحلة الكبرى – مصر
