أراجوز
$$$$$$$$$$$
أراجوز متعود يتنطط
علي خلق الله
وتملي بيشتم وبيغلط
ف اصحاب الجاه
أراجوز تعبان وبقاله زمان
مربوط ف حبال ف ايدين اندال
وفاكرها حياه
أراجوز ومخاوي ومتاوي
أفشر دجال
ف لسانه بيمدغ كام فكرة
أصلها عجباه
وفاكرها شطارة انه يقطع
في عباد الله
أراجوز مسكين وبقاله سنين
بيقول لله
بهدوم دمور عامل أمور
بيعاكس من غير اي حياه
والناس بتقول أدي الأراجوز
لحظات وهيدي الناس بالجوز
أصل الأراجوز ده كان محظوظ
كده يا ولداه
أنا قلت اصاحبه وألاعبه
يمكن م يفوق
أتريه مخنوق من ناس واصله
بتبص لفوق
مربوط بخيوط كانت دايبه
واعصابه ياناس كانت سايبه
ويا حول الله
لابس طربوش احمر منه
ومصغر دايما من سنه
إكمنه بيرقص كالعقرب
والعقرب كان اجدع منه
وماقالش الآه
أراجوز وبيضحك ع الفاضي
وبعيشته ما هوش أبدا راضي
قدام الناس عامل قاضي
واتاريه مخبول وكمان مهبول
كده يا ولداه
كان فاكر إنه بيخدعنا
وكلامه داخل ف دماغنا
أتاريه مش حاسس بجروحنا
وللا عمره حس بأوجاعنا
منه لله
أراجوز كان عامل علامه
وبيوعد سلمي بسلامه
أتاريها خيابه وندامه
والكل اهو تاه
أراجوز كان حافي بدون شبشب
وعملى فيها الواد لبلب
وهيضرب عنتر ويبعتر
كام زعتر يمكن يوم يكسب
أتريه اتبعتر واتشعتر
والسجن تواه
أراجوز مصنوع من خشب ابيض
مايساوي حِسبة تلت أبيض
كان ناوي يحاوي ويخاوي
عفريت مش لونه قمحاوي
أسمر ومربع ف الأبيض
بالكرسي غواه
أراجوز كان قاعد ف الضلة
من جنبه كات قاعده الشلة
بيبيعوا حضارة ومسلة
ويقولوا أدينا بنتسلي
علي خلق الله
فاكرينها خلاص ملهاش صاحب
وهتبقي مغانم ومكاسب
ومصيبة بتجُر مصايب
والحق أهو تاه
&&&&&&&&&&&&&$&&&
