الرئيسية » مسابقة الشعر العامى » عارفه يا ماما..مسابقة شعر العامية بقلم / هانى جلال من مصر

عارفه يا ماما..مسابقة شعر العامية بقلم / هانى جلال من مصر

هانى جلال
كفر الشيخ
شعر العاميه
عارفه يا ماما
عارفه يا ماما
كلمة بابا
لو يوم باسمع حد يقولها
باغرق فيها وف تفاصيلها
بابا يا بابا يا بابا يا بابا
فيها ايه يعنى
راجل عادى
داخل طالع
ماشى وراجع
يمكن يغضب او يتعصب
مره بيشتم مره بيضرب
رايح فين او جى منين
قص ضوافرك
قصر شعرك
خليك شبه البنى آدمين
حاجه تعقد
صح يا ماما؟
عارفه يا ماما
لما بشوف اتنين يتخانقوا
واحد مره يقول للتانى هقول لباباك
بابقى ف نفسى حد يقولى هقول لباباك
بابا يجيبنى ويأنبنى ويمسك ايدى ويشخط فيا
يمكن حتى هيأسى عليا
بس انا عارف
كنت هاشوف ف عنيه حنيه
هالقى ف غضبه حضن حنان
اصل اليتم يا أمى بيكسر
كلمة بابا ف وسط الزحمه بتدى امان
ايوه انا عارف
انك وقت الجد وقفتى
وانك وقت الصبر صبرتى وما هنتيش
وانك كنتى ابويا وامى
واستحملتى مشاكلى وهمى وما اشتكتيش
ايوه انا عارف
انك رغم الجرح يا امى ما قصرتيش
بس يا ماما
كلمة بابا
لو يوم باسمع حد يقولها
باغرق فيها وف تفاصيلها
باسرح غصبن عنى يا امى
واحلم انى ف مره اقولها
سامعه يا ماما
بابا يا بابا يا بابايا باب
#هانى_جلال

تعليقات

تعليقات

عن همسه

همسة هى مجلة كل الناس وكل الأعمار . المهنية والصدق شعارنا .ننقل الخبر من مصدره الحقيقى ونسعى دوما للتجديد من أجل القارئ

شاهد أيضاً

طقوس سرية .مسابقة الشعر العامى بقلم / مها الغنام .مصر

مسابقة الشعر العامى -اسمى مها الغنّام -مصر القصيدة بعنوان (طقوس سرية) مها الغنام طقوس سرية …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *