الشعر والأدب

عكازي على الأيام..قصيدة للشاعر / بكرى جابر

بكرى جابر
( عكازي على الأيام )

ومش خايف أموت قبلك و لا تشوفنيش
ولا عيونك تبص ف وشي وتشوفك بتسكن فوق تفاصيلي
وحضنك مني يترمل يا عبرحمن ؟؟
يا ترياق الوجود كله ولو كان الطبيب شاطر
وجنبي الحُكَمه بالميه
يا زادي
وكفني
وعنيا
و عكازي على الأيام
أهون تبعد
وانا لسه ف نفس مكاني مستني
وشايلك شوية فكه ف جيوبي
و كيس فاكهة جايبهولك يا سيد الناس ؟؟
أهون عندك يا عبرحمن
وانا الخايف عليك م البرد و الغربه
وم الأيام ؟!
و لسه إيديك ف طرف هدومي بتعيط
أرووووح وياك
أشيلك فوق كتاف قلبي والف الدار انا وانت سبع لفات
تدوخ مني
أسيب قلبي على كفوفك
و اولي بعييييييد
و اروح الشغل متأخر
و يتبخر عتاب اللوم من الناظر
و اقول حاضر
…. أنا الغلطان
واخش الفصل واتملا ف وش عيال زهور خضره
بتسبق بكره بالأحلام
و اقول ربي
و أقول بلدي
ألاقي الصوت ورا مني كما الطوفان
تشب الفرحه ف عيوني
أدوب واحكي عن الإنسان
و اشوف قلبي مع قلبي على التخته مع العفاريت بيتشاقى و انا فرحان
أعيد الشرح من تاني
ومن تاني
عشان الكل
عبرحمن
جرس قاسي ف عز النشوه
بينادي خلاص مِروح
تفر ملايكة الرحمن
على جناح الأمل تجري
وانا رهوان
أسابقهم وانا باجري وانادي عليك
أنا جيتك يا عبرحمن
ألاقي فوق كتاف قلبي بتتشعبط
و بتخبط
أنا منك ياخوي زعلان
أشيلك إربه فوق ضهري و تتمايل وانا ويالك
أقول توبه يا نن العين
تقول كداب
كده بردوا تغيب عني وانا وانت مع اخواتك
وكنا الحب و الأحباب ؟!
بقى عندك من الأصحاب كتير خالص
وانا بعدك مليش أحباب

تعليقات

تعليقات

الوسوم

همسه

همسة هى مجلة كل الناس وكل الأعمار . المهنية والصدق شعارنا .ننقل الخبر من مصدره الحقيقى ونسعى دوما للتجديد من أجل القارئ

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق