الشعر والأدب

على كفى ..قصيدة للشاعر / إيهاب يحيى ابو طه

ايهاب يحيى
………………………..
على كفى
رويت الشعر فى كتابك
وفاض الدمع موالى على ترابك
يحنى كعبك الدايب من الفرقة
من الحرقة فى غرقة دمى بأعتابك
أنا المصلوب بعدى العمر م الساقية
وأنادى الفجر يحتلك وبالعافية
ومتغمى وسيف الجبن فوق ضهرى
يفوت عمرى فدا قهرى
وأبات مطروح عديم الروح على بابك
شايف كل ما بيجرى وأنا دارى
وهجرك ليلة بيعشش على دارى
ما هو أنت بموتى مسئولة
وفى غيابك
على جبينى دفا خالى من الاحساس
وداع بارد مافيهش تماس
يبان انك نسيتى الصفحة مفتوحه
وألاقى كل مابيننا ف ايدين الناس
وفى الزحمة الحقيقة تتوه
شهيد عشقك صبح مشبوه
وأراجع حسبتى تانى
ألاقى سرتى وجعانى
بجد اللى حصللى جنون
وزايد عمرى فى الناقص
ماهوش ناقص
يزيد البعد بعتابك
انا ابنك وانا منك
وأنا الحر اللى صان عرضك
أنا اللى كساكى توب أرضك
وخدنى القهر واترجيته قام سابك
وأنا اللى عمره ما اغتابك
يا عشقى
الطاولة قلابة
كراسى الجلد فتانة وكدابة
غلابة وقبل ما نفكر
بنتفجر ونتعجز ونتغبر
ونمشى الفخر ساندنا
ما راحش سلاحنا من ايدنا
ولا اتعودنا
نسامح كلب يوم صابك
أنا اللى قمت بالثورة بطيبة روح
وأخويا اللى نزل شالنى بقميص مفتوح
لا كان نازل بدبابته يأدبنى
ولا خاننى ولا سلمنى طير مدبوح
يناير حقى أنا مش هم أو غيرهم
ويونيو برضه من حقى مانيش منهم
ما انا اللى جريت ورا كبيرهم
فخان الدقن والبيعة وراح باعك
انا كل اللى عاشقينك وأتباعك
أنا الفلاح وأنا الملاح وأنا الميرى
وجامع بين منى وميرى
مخلف مصطفى وجرجس
بقدم كل يوم المهر مدى ايدك
وطاوعينى وبايعينى أنا جديدك
فطارى منك الضحكة
وغداكى عندى من خيرى
فما تحاوليش ما عاد ينفع
تحبى ازاى واحد غيرى

الوسوم

همسه

همسة هى مجلة كل الناس وكل الأعمار . المهنية والصدق شعارنا .ننقل الخبر من مصدره الحقيقى ونسعى دوما للتجديد من أجل القارئ

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

إغلاق