الرئيسية » مسابقة الشعر العامى » عم الطيب .مسابقة الشعر العامى بقلم / محمد أسامة موسى من / مصر

عم الطيب .مسابقة الشعر العامى بقلم / محمد أسامة موسى من / مصر

الاسم : محمد اسامه موسى
البلد : جمهورية مصر العربية
الهاتف : 01210330628
نوع المشاركة : شعر العاميه المصريه
اسم القصيدة : عم الطيب

على أخر ناصيه ف شارع بيتنا
كان بيعدي يوماتى ف نفس الوقت تمام
يركن عربيته اللى زاققها لحد ماجلنا
يسند ضهرة ف سور الجامع
من تعبه يغفل وينام
———————————–
يرمي ف حضن الشارع روحه
يلقى ف عز البرد دفاه
يتكلفت بهمومه ونوحه
ع الافراح اللى مفارقاه
من همه بيحكيلى همومه
وبفضفض بهمومي معاه
—————————-
كنا بنقعد سوا ونأزأز
لب من اللى ايديه عاملاه
من غير ما اشكيله من الدنيا
كان يسرق من روحي الآه
كان بيفسر حالى لحالى
وكأنه فيه شئ لله
—————————–
شال طول عمرة هم عياله
من ساعه ما الحجه اتوفت
داين روحه وجهز بنته
وماشفهاش من يوم ما اتزفت
والواد لما يكون محتاجله
كان بيزوره
بس بقاله كتير مش باين
من ساعه ما جيوبه اتدفت
—————————-
كان محبوب م الشارع كله
وطيبه قلبه
كت بسهولة تبان في ملامحه
كنت استغرب لما بشوفه بيدعي لبنته
وان جت سيرة الواد الغايب
كان بيقول : والله مسامحه
—————————-
راجل طيب بس الطيب
يبقى ف حظ الدنيا ملوش
رغم حياته بكل اساها
لسه الضحكه مافرقتهوش
وانا لقبته بعم الطيب
صاحب اعجز وش بشوش
——————————
إتعودت انى اسمع منه
و اتعودت انى احكى معاه
كنت يوماتي بروح ع الناصيه
قبل المغرب واستناة
يجي ونحكي ساعات وساعات
بس ف مرة قعدت استنى
عدى المغرب و معداش
واما سألت عليه فى الشارع
ردوا عليا : روّح يابنى ماتستناش
عم الطيب صاحبك مـــــــــــــــــــات

تعليقات

تعليقات

عن همسه

همسة هى مجلة كل الناس وكل الأعمار . المهنية والصدق شعارنا .ننقل الخبر من مصدره الحقيقى ونسعى دوما للتجديد من أجل القارئ

شاهد أيضاً

بميزان الأخلاق . مسابقة الشعر العامى بقلم / أمل عبد الفتاح قطب . مصر

شعر العاميه النص بعنوان بميزان الاخلاق شوف الشمس وشوف القمرة وشوف النايم تحت الشجرة شوف …

2 تعليقان

  1. روعه جدا يا محمد اسلوبك حلو جدا جدا

  2. انا بجد اتأثرت جدن :)))) كلمات اكثر من روعة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *