ط
مسابقة الشعر العامى

ع النوتة ..مسابقة الشعر العامى بقلم / سيد عربى من مصر

خاص بالمسابقه
الشعر العامي
الشاعر سيد عربي
قصيده ( ع النوته )

ع النوته
—–
عشان الحلم
أصبح برضو ع النوته
وصوت كروان وبيزقزق
يقول الشمس بنوته
لقيت العتمه بتكوع
فى عز البرد
لقيت الحلم متطوع
يبوس الورد
لقيت الكد فوق الحد
داس الخد .. ع النوته
وع النوته
الغرام جايز يكون مكتوب
بيتقيم ويتقدر
ودايما يجى بالمقلوب
وتقرير الوجع كاتب
عنينا فى ساقيه مربوطه
وباب الرزق متحنجل
مصمم يجى .. ع النوته
و ع النوته الحياه تنعاش
وصوت الحق فى الإنعاش
وكام واحد بيتقدر
ومات وعاش
على النوته
وع النوته نبيع فى كلام
ونتمرد على الأيام
ونتعتور فى أحلامنا
نلاقى السكه مضبوطه
بيتدحرج علينا القهر
تملى نبوسها وش وضهر
ولو مره ما صابش الزهر
نلاقى الدمعه مكبوته
وع النوته بقينا نخون
بنتلون تقول ميت لون
ولو أنفاسنا جت فى الجون
بنحسبها على النوته
وع النوته الشجن يتباع
وأحلام الوطن تتباع
ولو ضحكتنا بنا مشاع
أخاف يبيعوها ع النوته
وع النوته الكلام جايز
يسطر بينا حدوته
وجايز مننا يخلص
ويتقطع من النوته
فيا للى ما شوفتش إمبارح
ملامح بكره
ع النوته

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى