الرئيسية » مسابقة الشعر العامى » فلاش باك. مسابقة شعر العامية بقلم /بكري جابر من مصر

فلاش باك. مسابقة شعر العامية بقلم /بكري جابر من مصر

الشاعر بكري جابر
محافظة الفيوم
خاص بمسابقة همسه عامية
————————————–

فلاش باك
======
فلاش باك
مفيش حاجات كانت هناك
ولا كات هنا
عشان ما ادوب ف رمش عينك م الضحا لحد الممات
ولا كانش فيه غير دمعه ناشفه ع الخدود
واجران سكات
حتى الأمل مشفتهوش
ما عشتهوش غير لما كنت ب اسرقك
وارسح بعييد
وافتح شبابيك الغياب
واكتب كتابك ع الولد من غير شهود
عند مأذون الغرام
واخلع هدوم الخوف شويه واتفرد ….
وابدر دموع العاشقين
تطرح يمام
تنزل ف إيدك ف اتولد
عاشق جديد
يحلّيِّ ف سنين العذاب
يا ميت نهار جوه أحلام الغلابه
ب اكرهك
ب اكره العجز المعشش جوه مني
والهروب جوه السكات
سكووووت هناك ……….
مشهد حقيقي مش كلام
شاعر يغني للعيال الشقيانين
رقصة الجوع و العذاب
حبة عيال متشعبطين علي غصن شوق
وجناح سلام
رافضين يصيروا للعدم
رافضين طابور الانتظار
راسمين عيونك يا حبيبتي
جوه نن العين وبس
والموت كتير
الموت فرح
رصيبف بيحضن ف النهار
شيلو الستار
خبوا الألم
صورة حبيبتي ف العلم
الله عليك
سكر قوي
الللللللله قوي
كان نفسي فيكي يا حبيبتي بدون مرار
ورق الجرايد
ميت كفن
قلبي يا صاحبي ياللي راقد ع الطريق
ضحكة عنيك
لمسة ايديك
فتحت بيبان الشمس
لونت وش الحزين
خضرت ضحك البنات
مدفون يا صاحبي جوه مني بالعلم
جوه شعر الصحبجيه
ف قهوة بلدي بنشربك
شاي ع الفطور
وف المسا
بتضم فينا يا حبيبي بكل شوق
و تشم ريحتك تنبسط
فتغني لعيون للصغار
سكوووووووت هناك …..
صدر القرار
مشهد الفصل الأخير
ترابيزه فاضيه للقمار
حبري سري
طلسمة كل الحدود
كل العقول
طيري يا طيارة خضرة م المطار
ابعت يا عم ياللي منتش عمنا
وشوش جنابك تسرق الحلم الكبير
تقتل القلب الحرير
و ارقص جنابك ف الفضا
بهدمة الواد الغفير
بملاية لف مرقعة بصوف الحصير
صورة حبيبها اللي مات
جوه الحصار
يا دي الغبار
العقل طار
لسه العيال السمر بيلعبوا فوق الرصيف
شيلوا الحصير
لمّوا الخيم
لوّنوا وش الحجاره بالعلم
و افرشوا بطن الحواري بالخَضار
يا مييت خساره ع الأمل
بيزنطه من باب الوزير ….!!!
و شيخ مشايخنا اتهبل
يتوضى من بول الحمار …!!
حتى اللي كان ( …. )
صورة حلوة كتاب النصوص
مبقش يشوف
غني من شعر العجم
و نصب له فينا ألف زار
مين السبب ؟!
ميين الحمار ؟!
وانا لما جيتلك يا حبيبه
كنت فاكر إن انا و بس الأمير
واني الوزير
واني اللي ساكن جوه نبضك ليل نهار
ليه لما جيت
رغم الظروف
وانتي اللي عارفه قصتي
كتبتي اسمي فوق جدار المستحيل
ورفعتي صورتي و ابن طولون فوق الجدار ؟!
قلبي اللي مات
مش مسامح يا حبيبتي انك ف يوم تاجرتي بيه
إوعي تلوميه
أو يوم تنادي ع الولد ينقش كفوفك ف الهوى
بريش الغرام
أصل الغرام
انا لمّا جبته
جبته كله بالحنين
مبقش يفيد
غير إني آخدك ف الخلا
و ارحل بعييييييييييد
و اكتب كتابك عند ماذون البلد
من غير شهود
واحلم حبيبتي
لحد ما يموت المرار …..
بقلم
—— الشاعر بكرى جابر السيد

تعليقات

تعليقات

عن همسه

فتحى الحصرى صحفى فنى ومصور فوتوغرافى محترف ..الصورة عندى هى موضوع متفرد قائم بذاته والكلمة هى شرف الكاتب هكذا تعلمت من اساتذتى فشكرا لكل من تعلمت منهم

شاهد أيضاً

مصر ست الكون بحالو. مسابقة العامية بقلم / محمود ربيع من مصر

قصيدة عاميه (مصر سِت الكون بِحَالو) محمود ربيع عبد الحميد مصر اسيوط ديروط …………………………………………. مصر …

2 تعليقان

  1. رغم الظروف
    وانتي اللي عارفه قصتي
    كتبتي اسمي فوق جدار المستحيل
    ورفعتي صورتي و ابن طولون فوق الجدار ؟!
    قلبي اللي مات
    مش مسامح يا حبيبتي انك ف يوم تاجرتي بيه
    إوعي تلوميه ** قمة في الروعة والإبداع الفني والتعبيري والتصويري شاعرنا الكبير بكري جابر

  2. “”فلاش باك”” عنوان لا أحسبه يليق سوى بهذه المشاهد التي و إن طغى عليها لون الألم …إلاّ أنّ لون الأمل يحجز له مكانا بينها في المشهد الأخير ….
    و يبقى الجمال في حرم بساطة الأشياء جمال ُ …
    أبدعت أستاذ بكري جابر .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *