مسابقة الشعر

فوبيا …خاص بمسابقة العامية ..للشاعر / أحمد فهمى من مصر


” فــــوبــيـــا “


جوّه الصندوق البوم مرمي
فيه ميت صوره ..
وبدون برواز !!
جوايا كلام محبوس لكن ،،
بيلم حروفه المكسوره ..
في قصيده إزاز !!
شقّيت في الذكرى دي كام مشوار
على كام حدوته ..
وكام قصه ..
جوه الصندوق
بتألم من وجع امبارح 
واهو كل ما احاول اشجعني !!
أو اعلي الصوت ..
بطلع مخنوق !!
ولقيت الحب وخبيته ..
من خوفي عليه ليتوه بينا
وسط الأيام !!
خليته قاموس ،،
واهو كل ما احاول ازور بيته ..
أو احاول اشوفه مع الأحلام
يطلعلي كابوس !!
ودي أغرب حاجه تجرّبها ..
انّك تدارى من الأحباب !!
فبرغم حضورهم في الحفله ..
وبرغم وجود كل الصحبه ،،
أخدوني غياب !!
شئ يوجع جداً صدقني ..
تتكلم مع نفسك دايما
او ترسم نفسك ع الحيطه
إنسان مدبوح !!
كام واحد جرّب يتعلّق ..
بحبال مـ الأصل كانت دايبه !!
واهو أول ما اتصاب مـ الدنيا
اتصاب في الروح !!
أنا حد مطنش للدنيا ..
مش عايز ابقى قريب ليها
بتسيبك وبتقسى فـ ثانيه ..
لو حتى انت اللي مربيها !!
سكتها طويله وغدّاره ..
ميغرش أبدا سكرها !!
لو دوقت فـ مره كاسات ليلها ..
على طول تديلك صبّارها !!
فرجعت لأوضتي المسجونه ..
أتعاتب مع نفسي عليا ،،
وأشخبط ع الدرج حكايه ..
بدايتها انا عايش رحّاله ..
إنسان مقسوم من جوه اتنين !!
النص الأول ” متهوّر ” ..
متقمّص دور راجل آلي !!
والنص التاني ” المتعوّر ” ..
وبرغم النار المتقاده ،،
عمال بيقول ” طب وانا مالي ” !!

مجنون رسمي .. !!
عمّال بيبدل في مكانه !!
ويبص يلاقي الدنيا راقات !!
أنا أصلا عايش في ” ميكانو ” ..
وبعاني من الوحده القاتله ،،
والحد التاني اللي ساكني ..
مقضيها عياط !!
بتملّى فـ عمري وفي حكايته ..
وبكلم نفسي على الفاضي !!
أنا واحد واقف في مرايته ..
اتصاب بالفوبيا من الماضي .. !!

بقلمي .. #أحمد_فهمي ،،

الوسوم

همسه

همسة هى مجلة كل الناس وكل الأعمار . المهنية والصدق شعارنا .ننقل الخبر من مصدره الحقيقى ونسعى دوما للتجديد من أجل القارئ

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

إغلاق