الرئيسية » الشعر والأدب » فى الميعاد دة ..مسابقة شعر العامسة بقلم / معتز عبد الموجود من مصر

فى الميعاد دة ..مسابقة شعر العامسة بقلم / معتز عبد الموجود من مصر

معتز عبد الموجود
مصر – بورسعيد
تليفون: 01111113436
قصيدة “في الميعاد ده” شعر عامية

كل ليلة في الميعاد ده
بفتكر عمري اللي عدي
بفتكر لمسة إيديكي
وأمشي في الشارع بتاعنا
بفتكر خوفي عليكي
وأحكي كل كلام جمعنا
وأما كنت بقول بحبك
تضحكي ضحكة فاكرها
وإنتي لما تقولي كلمة
يبقي ليها ألف معني ..!!

لسه فاكر صوت زعيقك
لما تتخانقي معايا
وأما فرجتي عليا
اللي رايحة واللي جاية
وأما أقول لك كلمة تافهة
وتعملي مليون حكاية
وأما ببقي معاكي هادي
وأما شمتتي الأعادي
اللي شايف واللي خايف
واللي واقف واللي عدي
كل ليلة في الميعاد ده ..!!

كل ليلة في الميعاد ده
ببقي شايفك وانتي واقفة
وإنتي مستنية أجيلك
وأما بتأخر عليكي
وتزعلي وأجري وأشيلك
وأما تبقي بعيدة عني
وألقي قلبي بيناديلك
وأما قال لي هي دية
وأما بديكي العيدية
وأما أجيبلك كام هدية
وتطلعي راضية بقليلك
بلقي عقلي راح وودي
كل ليلة في الميعاد ده ..!!

لسه فاكر حد عاكسك
مره ومسكت في خناقه
واللي راكب قطر قلبك
يجي يسمع م اللي ساقه
واللي سامع عن غرامك
برضه مش زي اللي داقه
لسه سامع نفس صوتك
لما بتقولي تعالي
ده أما بفتكرك حبيبتي
ببقي عايش أحلي حالة
بلقي نفسي في دنيا تانية
وإني أفوق منها إستحالة ..!!

لسه فاكر برضه شكلك
لما تتداري في حضني
وأما تحكي لي .. مشاكلك
وأما ناكل مرة برّه
وأشغلك وآكل في أكلك
وأما أشوف نفسك في حاجة
وأما أقول لك من عنيا
وأما بنسي كل حاجة
لما أشوف خوفك عليا
وأما عيني تروح معاكي
وإنتي رايحة وإنتي جاية
كنتي بتشديني شدّه
كل ليلة في الميعاد ده ..!!

لما بكتب لك وأقول لك
ببقي عامل ميت إذاعة
وأما بسرح فيكي كلك
ممكن أسرح ألف ساعة
وأما غاروا من كلامي
قالوا دي حتة بتاعة
اللي كان داخل طلع لي
واللي كان خارج رجع لي
واللي كان واقف سمع لي
واللي وقّف .. واللي هدّي
كل ليلة في الميعاد ده ..!!

لما عيشنا زمان حقايق
سيبنا ذكري في كل حارة
وأما بفتكرك دقايق
بنسي في إيديا السيجارة
وأما أشوفك وأبقي سايق
شوفي بكسر كام إشاره
لما حبيتك صارحتك
إنتي فرحة زمان فرحتك
لسه بسمع تاني صوتك
لسه إيدي فيها ريحتك
إنتي عود فنان وريشته
إنتي أجمل فيلم عيشته
وإنتي أجمل حلم عدي
كل ليلة في الميعاد ده ..!!

تعليقات

تعليقات

عن همسه

فتحى الحصرى صحفى فنى ومصور فوتوغرافى محترف ..الصورة عندى هى موضوع متفرد قائم بذاته والكلمة هى شرف الكاتب هكذا تعلمت من اساتذتى فشكرا لكل من تعلمت منهم

شاهد أيضاً

عنوان اغتراب ..قصيدة للشاعرة / شيران الكردى

عنوان اغتراب ،،،،،،، ******************** روضةُ العمر قد دنت من صبورٍ فاحَ منهُ عطر زهر الخِطاب …

تعليق واحد

  1. مبدع يا باشمهندس الشعراء

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *