الرئيسية » مسابقة الشعر العامى » ف قلب كمين ..مسابقة الشعر العامى بقلم / محمد عسل

ف قلب كمين ..مسابقة الشعر العامى بقلم / محمد عسل

قصيده عاميه، للمشاركة بالمسابقة
بعنوان
( ف قلب كمين)

ومين تاني ف قلب حروفي كان مَنسي؟
بنادي بصوتي وبحسي..
علي القاعدين ف ضِل التوته يشربوا شاي..
علي السامعين لصوت مزيكا فيها الناي..
علي الدايبين ..
علي الصاحيين ..
علي النايمين..
عليّا يمين ماانا حالف بأيوها شئ..
لأني برئ..
ولا كُنت السبب ف البُعد بين حبيبين..
ولا كنت المسافه القاسيّه بين قلبين..
بقولها أمام جميع الخلق ياساده..
أنا واحد من الواقفين ف قلب كمين..
معايا الرُخصه مظبوطه..
وطفّايتي ف أخر كُرسي محطوطه..
وأي حريق هايحصل هبقيّ ليه جاهز..
ومش عايز مُقابل من عباد الله..
ياخلق الله أنا واحد حبيبُـه نَساه..
وعشت سنين أخبي الشئ إذا مكشوف..
بكل كسوف بكون دَبوس لصِدر بنيّه بضفيره..
أنا عُمري مادُقت ف يوم لأيوها شُرب أو بيره..
دا قالوا الناس بإن القلب خمّاره..
وإن عنيّا سِناره..
وقالوا شيطان..
وقالوا بعاكس النسوان..
وأنا أصلاً مابنطقشي لأني خجول..
ومش مهبول عشان أغطس ف بحر الشوق..
وأموت مخنوق..
دا بحر وكل سمكُـه غريق ..
وأنا إنسان ف يبقيّ هااطيق؟
أنا غير الأدب مالييش..
وفوقُـه الذوق كمان بقشيش..
وماشي ف قلب قلب الحيط..
وعمري ف يوم ماكنت حويط..
وصاحب نيه شفافه ..
وبحلم إني م الأحلام حقيقي بجد أتعافيّ.
دي أحلامي بتطلع فيها كوم كوابيس..
ف مره حلمت بوكس بوليس ..
وأنا جواه ..
ونبض القلب بيقول آه..
سيبوني حزين..
أعيش العمر مستنظر ف قلب كمين..
أنا خايف أكون ناسي لأيوها حد يدبحني..
ف قولوا لشئ يفرَّحني..
وقولوا بإن شِعري جميل وعاشقينُـه..
ولو يغطس ف كومِة قش عارفينُـه..
أنا معاكم ورب الكون ..
وقلبي حنون ومش مجنون..
ووقت الشِده نادوني..
دي روح الروح عشانكوا تهون.

بقلم.. محمد عسل

تعليقات

تعليقات

عن همسه

همسة هى مجلة كل الناس وكل الأعمار . المهنية والصدق شعارنا .ننقل الخبر من مصدره الحقيقى ونسعى دوما للتجديد من أجل القارئ

شاهد أيضاً

فوق الأفيش . مسابقة الشعر العامى بقلم / رضا أبو الغيط . مصر

خاص بالمسابقه الاسم رضا أبو الغيط – مصر ٠١١١٠٦٣٠٢٤١ فوق الأفيش ********** فوق الأفيش صورة …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *