الشعر والأدب

قصيدة : بنت الريف للشاعر / محمد أبو العبادى


بنت الريف

عشان ف جمالها شئ تانى

ماهوش موجود ف اى مكان

عشان فيها الجمال الوان

بلون الخضرة طلتها

وضحكتها ..

بلون الفجر لما يبان

اشوفها احس بالتوهان

ما انا العاشق جمال عودها

وانا اللى الورد فى خدودها

يخلينى ف لحظة ضعيف

انا العاشق لبنت الريف

وانا اللى صعيدى من قبلى

اصون العهد طول عمرى

واحافظ ع الاصول حتى

ولو حطوا ف رقبتى السيف

وبنت الريف

بلون الخضرة والمية

تشوفها وقاعدة ع الترعة

تقول البنت دى حورية

وجنية

بتسحر اى قلب يفوت

وتخطف م العقول تخاطيف

ماهيش واحدة من البندر

ولا ابدا بتلبس شاش

دى تقدر تمشى تتغندر

وما بترضاش

وتلمحها ف عز الصهد

بتوب كاسى لحد الارض

ما هى فعلا تصون العرض

ومنها العفة تتعلم

معانى كل قلب عفيف

ف صوتها معانى للرقة

ويمكن سيمفونية بوح

وفيها الروح

كما البلسم

كما الترياق

ماهى المفطومة ع الاخلاق

وع التقاليد

ف طلتها هلال العيد

وخطوتها نسيم الصيف

دى بنت الريف

محمد ابو العبادى

الوسوم

همسه

همسة هى مجلة كل الناس وكل الأعمار . المهنية والصدق شعارنا .ننقل الخبر من مصدره الحقيقى ونسعى دوما للتجديد من أجل القارئ

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

إغلاق