الشعر والأدب

قصيدة (ريحة الأسفلت) للشاعر / خالد عاطف أبو العزم

ريحة الأسفلت

===========

اليوم ماهوش عادى

اليوم عجيب

ليه طعم أنفاسك .. غريب ؟

انا وانتى ليه ب ننهَج ؟

ليه الهوا مابقاش يسافر بينّا بالراحه ؟

والإبتسامه .. تبقى ب جراحَه !!

والنظره .. دايماً تَحت .. مش للأمَام !!

الدنيا فاضيه ..

واحنا بس زحام !! .

بنلاقى بعض ف زحمة الكراكيب

ونقول كلامنا المكوى ف الدواليب

ونشيل فَشَل على ألف شمّاعه

نولّع الأحلام .. ب ولّاعه

نَفَسين وتخلص .. يبقى فاضل رماد

الدنيا حلوه ..

بس .. واحنا بُعاد !!

ولو نقول الصبح بينَّا ميعاد

الفجر .. ب يطلّع لنا لسانُه

والعجز يخنقنا بدخّانُه

ماسكين ف بعض .. وتوسع المسافات !!

يبقى الكلام .. جوبات

واللمس يبقى من بعيد .. لبعيد .

أنا وانتى ليه .. لا ف دفتر الأموات

ولا المواليد ؟

ف القُرب نبقى بعيد

وف بُعدنا نقرّب

أسوار بلا مَهَرَب

غير الوداع المر .. ع الكورنيش

وأيّمَانات .. ع العيش

إن احنا نحفظ عشقنا فى الملح

نسد بيه الجرح

يمكن تحبه الدنيا .. يوم شم النسيم

وتحطنا ف عالم مالوش موازين

بين ناس كتير زى السمك .. ب تعوم

وناس كتير زى السمك .. زفرين .

أنا من زمان حاولت أبقى ( Ropot )

أضمن ما احسش كل يوم بالموت

مافيش وجع .. لو شوقى كان آلى

ب لمسه واحده يرخص الغالى

فى سباقها أجرى ..

وابقا مُتَصَدِّر .

ب فِعل همجى .. وشكل مُتَحَضِّر

وقلب يشبه ريحة الأسفلت

اللعبه سهله ..

وفيها برضو فَشَلت .

وفيها مش مسموح بدور تانى

انا لسّه برضو شعورى إنسانى

أحب .. لكن بالضروره أخيب

والاقيكى .. بس ف زحمة الكراكيب

يمكن ألاقى لروحى شمّاعه

ورف فاضى ل قلبى .. ف الدواليب .

خالد عاطف أبو العزم

الوسوم

همسه

همسة هى مجلة كل الناس وكل الأعمار . المهنية والصدق شعارنا .ننقل الخبر من مصدره الحقيقى ونسعى دوما للتجديد من أجل القارئ

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

إغلاق