خاص لمسابقة همسه الأدبية
معوض حلمي على
01026627062
( عامية )
…………………………
…….. أخر نبض ……..
…………………………
كنت سارح
بين غيطان الأمنيات
كنت طاير ،
زي العصافير ع الشجر
فجأة حبيت السكات
كنت باحلم بنور الفجر
يطلع شقشقه
والليل معاند رافض طلوع الشمس
سرسب الإحساس شقى
واتخطف ضي العيون
كل الوشوش رغم إختلاف اللون
باشوفها باهته معتمه
ساعة الوجع كل الملامح مؤلمه
حتى الفرح بقى ضيف عزيز
والجلد كرمش من مرار الإنتظار
والدم فار م الاورده بلغ فرار
مالناش نصيب في الإختيار
والقلب مش عارف يعيش
رمينا زهر الآمنيات طالبين جوهار
وجالنا شيش
وإزاي أعيش وأمد ريش
والريح معانداني
وبذرة الأحزان عفيه
ونبتها شيطاني
ومين اللي وداني لشلة المحاسيب
شيلوني الشيله وحاسبت ع المشاريب
وانا الغريب اللي خوفي غطاني
ضاق المدى والدمع أصبح مستباح
عايزين نطير
وإزاي نطير من غير جناح
حتى الصباح اترسم وهم وخداع
طب مين اللي باع ..؟
ومين اللى عبى القلب بالأوجاع
وإزاي يساع الكون قلب اترعش م الخوف
وإزاي دموع الأسى تفتح بيبان الشوف
صوت الدفوف اتوشم في وداننا موت
ولف علينا الألم والعمر عدي سكوت
فتح التابوت ، مستني آخر نبض
والجته رافضه الإنهزام
رافضه طلوع الروح
طلعت تدور ع اللي باقي
ف مخلة الدراويش
ملقتش غير كلاكيع وجع
وحبة امل تناتيش
فتحوا المزاد للبيع
فرت الكراريس يمكن وقع
بين السطور لبن الرضيع
مات الربيع
خضار الروح قلب لبوار
دار ع المدار الساقي
صوت السواقي لم البواقي نفير
والأرض شقت م الشراقي
نشفت دموع البير
والأرض شقت م الشراقي
نشفت دموع البير
…………………………
بقلمي الفلاح الفصيح
معوض حلمي علي
منشأة بطاش
تمي الأمديد
دقهلية
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
