مسابقة الشعر العامى

كلام مخنوق . مسابقة الشعر العامى بقلم / حسن محمد حسن .مصر


الإسم / حسن محمد حسن
ت / 01145318362
نوع المشاركه / شعر عامى
قصيدة / أفكار مخنوقه

كلام مخنوق
حسن غرام
—————————
أنا نفسى أقول الشعر
وحروفى مشنوقه
مربوطه بالفكره
والفكره مخنوقه
والشعر مش بلجام
ولا عمره كان أعوج
ولا يتوزنش بكام
الشعر مش أعرج
الشعر خيل أهوج
محتاج يطب الفضا
يجرى على كيفه
الشعر ساعة رضا
الشعر ده بكيفه
لا يحب تكتيفه
ولا يقبل السوقه
كان نفسى أقول الشعر
وحروفى مشنوقه
*******

مع إن شعرى خيل عفى
قادر يشق الريح
ماسك لجامه شيخ وفى
ناصب ف قلبه ضريح
والموت صريح ….
الموت حقيقه متتنسيش
وانا شعرى سارح فى الخلا
شارب شرود الطيش
كافر بكل ألألسنه
وبعتمة الخفافيش
أنا شعرى شئ فاجر قوى
شعرى بجح مبيختشيش
مبينطويش
وإن يوم مزاجه جه طلب
حضره ومديح
أنا شعرى حاله متنتهيش
درويش
يسرسب فى الخلا تواشيح
الشعر مش تفاريح
دالشعر فرش هموم
الشعر معرض وجع
لسان ضعيف مظلوم
من فقره طاطى وركع
شارب أمل مسموم
لكنه واقف جدع
وبرغم كل البدع
رافض أكون جلاد
ناسى فروض الشنق
وامسك معاى كرباج
وانفض قلوب الخلق
انا شعرى مش تعاويذ
ولا طلسمة أباليس
تعمى عيون الحق
زاد المرار ف الحلق
طفح الميزان والكيل
الفكره ف التطبيل
والفرصه مسروقه
وأنا نفسى أقول الشعر
وحروفى مشنوقه

الوسوم

همسه

همسة هى مجلة كل الناس وكل الأعمار . المهنية والصدق شعارنا .ننقل الخبر من مصدره الحقيقى ونسعى دوما للتجديد من أجل القارئ

مقالات ذات صلة

تعليق واحد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

إغلاق