كنز ومازال مدفون .مسابقة شعر العامية بقلم / محب منير توفيق مصر

محب منير توفيق . مصر
شعر عامي…كنز ومازال مدفون
عن البنت اللي لو تزعل
تهد الدنيا بالضحكه
وتكتم ف الوجع بشويش
عن البنت اللي لو تسأل
عليها يقولوا هتشيلك
ولو مفيش ف بيتك عيش
وتبني معاك و متهدش
ولو اعصار متتهزش
عن البنت اللي عايزه تعيش
عن الشوك اللي طارح ورد
عن الضحكه في وقت الجد
وحضن يدفي حر وبرد
عن البنت اللي بتفرّح و متبكّيش

عن الرغي لساعات وياها
ولا بتزهق ولا بتمل
ولو جربت مره دواها
هتلقاها للمشاكل حل
وباللي جواها تتباهى
عن البنت اللي ملهاش حل
في عز زعلها بنوته
بتتصالح بكلمه ونص
ولو تغضب كابسكوته
هتحضنها تدوب وتحس
وتنسى انك سبب خوفها
عن البنت اللي وظروفها
في عز ماهي تعباها
بسمتها مابتفارق شفايفها
عن الغيره بنار وبحب
عن المسافات في وقت القرب
واللهفه اللي بتنبتها
عن الوقفه قصاد بيتها
ومره مسكت يوم ايدها
قالتلك بس.. مكسوفه
عن البنت اللي معروفه
بإنها غير بنات الكون
في غيبتك عنها عارفه تصون
عن البنت اللي مش بتخون
ولا بتهجر ولا بتغدر ولا بتصد
ولا تلاوع عينيك ف الرد
عن البنت اللي عارفه تمد
جسور سعاده لأي عيون
وعن معلش مابتتقالش
عشان افعالها بتطبطب
وبتداوي ومابتتقلش
وعارفه ازاي تكون اقرب
عن البنت اللي تتكهرب
لو اتجرأت ف اللمسه
عن البنت اللي من همسه
بتسمع نبض جوه القلب
وقلبها اوسع من الدنيا
ساعات تلاقيها ام بجد
وكتير بنتك وتوأم روح
عن البنت اللي مش بتروح
مكان إللا تكون شيلاك
في تفكيرها منين ماتروح
عن البنت اللي عطر يفوح
منين ماتكون تسيب بصمه
وعن مخلوقه مش ف الكون
ولا تجسدها 100 رسمه
لا كلامي هيوصفها
ولا دواوين هتنصفها
عن #كنز ومازال مدفون