خاص بالمسابقه
————-
من الديوان السابع قلب المرمر
لإمته نعيش
لإمته نعيش على أحلام
ونفسى حقيقه ألمسها
ويصحى الشوق على أوهام
بتجرح كل ماالمسها
لإمته هكون طرف تالت
وزهره ف أرض بغرسها
عشان حبيبين يكونو لبعض
وانا المجروحه مش حاسه
—-
لإمته هكون شموع بتدوب
لكل العاشقين فرحه
ومش شايفين ضلوع بتدوب
وماتئنّش ولا بصرخه
وإمته ياحزن تفارقنى
وما تلومنيش لفين رايحه
—-
وإمته ياعين تشوفى النور
وقلب إتمنّى يوم يضحك
أخطّى الخطوه مش حاسه
ومن همّى أنا بضحك
عشان مش شايفه غير نفسى
أنا لوحدى ومش بضحك
—-
يادنيا بتكسرى نفسى
وزارعه ف أرضى كل الشوك
عملت عبيطه عن نفسى
وقلت اعشق أحب بشوق
قلوب المرمر اتكسرت
وفاضل فيها صوت مخنوق
كلمات/ عبد الناصر رجب كامل
