الرئيسية » السيناريو والحوار » لمبة حمرا . مسرحية من فصل واحد .مسابقة السيناريو والحوار بقلم /أحمد محمد زايد من مصر

لمبة حمرا . مسرحية من فصل واحد .مسابقة السيناريو والحوار بقلم /أحمد محمد زايد من مصر


( مسرحية لمبه حمرا ) لمبه حمرا
مسرحيه من فصل واحد
تأليف / احمد محمد زايد
المشهد الاول
قبل فتح الستاره
شخص ينادى / ياعم عبد العزيز …ياعم عبد العزيز
صوت نسائى /مين اللى بينادى؟
الشخص/ انا صبحى فراش المدرسه …خلى عم عبد العزيز يروح المدرسه حالا يقابل حضرة الناظر …هما هناك مستنينه ..ماتخليهش يتأخر
صوت النسائى / حاضر هو صحا اهه ربع ساعه يكون هناك ..ياترى عملوا ايه العيال فى المدرسه …يكونوا اتشاقوا مع حد ولا عملوا ايه ..ربنا يجيب العواقب سليمه
تفتح الستار على فاطمه ..وهى تقوم بكنس المكان ونظافته وتفتح المذياع اثناء عملها بترتيب المنزل
عبد العزيز / يدخل قائلا قطيعه فى التعليم واللى بيتعلموه لما توصل لكده
فاطمه / تنخض ..تتفل فى عبها قائله مين عبد العزيز
عبد العزيز / هو ياختى بشحمه ولحمه
فاطمه / طاب ومالك كده ما انتش طايق نفسك ..عيالك متخانقين مع حد
عبد العزيز / لا يافاطمه ماحصلش
2
فاطمه / اومال ايه اللى مزعلك ومخليك مدخن يازوزو ياخويا
عبد العزيز / اللى مخلى عفاريت الدنيا راكبانى ..هو وضع التعليم اليومين دول ياطماطم …تتصورى لما دخلت الفصل لقيت تلتين التلامذه غايبين ..لا وايه العيال فاتحين الموبايلات على اغنية ادينى رمضان وهاتك يارقص وهاتك ياصقف ولا عاملين اعتبار لمدرس ولا لناظر وناقص يجيبوا المدرس يحزموه ويرقصوه معاهم ..وسيادته عامل مش هنا ..ولما لومتوا ع اللى بيحصل بصلى وقاللى ..الضرب ممنوع رسمى يا استاذ ..وبعدين انت عايزنى اشد عليهم ..عشان يبطلوا يجى الدرس الخصوصى بتاعى ..عايز تقطع عيشى يا استاذ ..جاى تحاربنى ف رزق عيالى وماخلصتش من حضرته
فاطمه / طاب المهم هما كانوا باعتين لك ليه ؟
عبد العزيز / عشان مصلحتهم طبعا
فاطمه /ازاى دى…. قصدى مصلحتهم ازاى ؟
عبد العزيز / حضرة ناظر المدرسه وحضرة وكيل المدرسه ..والساده المدرسين والمدرسات الاحياء منهم والاموات ..والاداريين والعمال ..كلهم اصطفوا فى طابور واحد كاطابور الصباح المدرسى وسألونى هل انت والد التلميذ زياد عبد العزيز والتلميذ اياد عبد العزيز ..قلت لهم جميعا بعد ان استجمعت قوتى وشجاعتى …نعم انا هو
وعندئذ قالوا لى ابناءك ضعاف فى مستواهم العلمى ويحتاجون لدرس خصوصى فى الانجلش والدراسات والعلوم واللغه العربيه ..والرياضيات
3
..والالعاب ..وتفضل بالتوقيع على تقرير المدرسه حتى تتحمل المسئوليه كامله
فاطمه / ووقعت يازوزو ؟
عبد العزيز / طبعا وقعت بعد ماقلبى وقع فى ركبى واتحسرت واتندمت اللى روحت لهم واتحسرت على تعليم زمان يافاطمه …لما كان فيه تعليم بجد
فاطمه / يعنى عايز تقول ان تعليم زمان اللى كان فيه المدرس يادوب بيقرا وبيكتب احسن من تعليم النهارده اللى مدرس الفصل فيه حاصل على الماجستير والدوكتوراه يازيزو …عايز تقول ان اللوح والقلم البوص اللى كنت بتتعلم عن طريقهم القرايه والكتابه فى كتاب سيدنا احسن من الحاسب الالى والتابلت وثورة التكنولوجيا المستخدمه فى التعليم النهارده يازوزو
عبد العزيز / شوفى يافاطمه …انا صحيح اتعلمت ف كتاب الشيخ سعد ..اللى خلانى احفظ حروف الهجاء مجمعه فى كام مقطع خلال ساعات لما شد ودانى بصوابعه وقاللى قول ورايا ياولا …ابتثجح …خدذرز ..سشصض…..عغفقكل….منهولاى… ولماحفظت الخمس مقاطع وانطبعوا ف مخى..بقيت بريمو فى القرايه والكتابه ومش ممكن ابدا اغلط لا فى القرايه ولا الكتابه ولا الحساب وطلعت من تحت ايد الشيخ سعد ..بريفكس ودا اللى خلانى اجتاز الاختبارات فى شركة الكوكاكولا وعينونى امين مخازن قد الدنيا ..ولما جم بعد منى موظفين جداد كان منهم ناس معاها الدوكتوراه وبتغلط فى الاملا

4
فاطمه / يوه يازوزو دا زمن فات ومات واصبح ذكريات خلاص انساه بكره ياخويا ينصلح حال التعليم ويبقى زى الفل ..انى سامعاهم فى الراديو والتليفزيون . بيلمحوا وبيصرحوا.انهم ح يهتموا بالتعليم
عبد العزيز / طيب ياختى عن اذنك بقى على مايبقوا يصلحوه ( يخرج)
فاطمه / على فين يازوزو؟
عبد العزيز / ح اشوفلى عربية بليله اسرح بيها عشان اعمل دخل اضافى لمواجهة حرب الدروس الخصوصيه اللى شنوها مدرسين المدرسه عليا وعلى ولادى وعلى كل اللى زى حالاتى ..وابقى سلميلى بقى ع الترماى ..باى ياحرمنا المصون ( يخرج ) ..
.ختام المشهد
المشهد الثانى ..
ستاره داخليه عليها يافطه كتب عليها اللجنه العليا لاصلاح التعليم مع يافطه اخرى كتب عليها ممنوع الدخول ولمبه كهربائيه حمراء مضاءه وعلى بعد خطوات
يجلس على كرسيه الساعى لمعى بيده منشه ويرتدى طربوش احمر وجريده من الجرايد اليوميه يمسكها مقلوبه ويقربها من وجهه ويسمع شخير نومه
ثم يدخل شخص( حموده ) يحمل صندوق خشبى معلق على كتفه ثم ينادى قائلا يافتاح ياعليم يارزاق ياكريم ..ثم يقول بصوت ممطوط ونصلح التعليم ونغير المفاهيم …ونخلى المقفول يتفاهم ..لو حتى كان غشيم ثم يحملق فى وجه الفراش دون ان ينتبه اليه ويخرج ثم.. تفتح الستاره على
5
ثلاث اشخاص امام كل منهم اسمه ..ضكتور صلاح …الثانى ضكتور مصلح …الثالث ضكتور صالح منهم اثنان نائمون …والثالث يفرك عينيه ..ثم ينادى يالمعى ..انت يالمعى ..انت يازفت ياللى اسمك لمعى
لمعى / افنديييييييم
صالح / ( للمعى ) ايه يا افندم انت كنت نايم ولا ايه
لمعى / لع ياضكتور انام كيف وحضرتك منبه عليا تبقى عينيه مفندله عشان الرادل اللى ع يصلح التعليم
د مصلح / كويس يالمعى وجه الراجل ولا مجاش
لمعى / لع ماداش لساه ياضكتور
د مصلح / ينام مرة اخرى ..طاب وحياة بوك ياشيخ تخلى بالك منيه احسن احنا مستنينه بقالنا عشر سنين
د صلاح / وهو نائم لع اتناشر سنه وست ايام وعشر ساعات
لمعى / ع العموم ادينا قاعدين لحد دنابو مايشرف اياكش حتى يجى بعد
قرنين عاد
صلاح / على رأيك هو احنا خاسس علينا ايه ..كله على حساب الحكومه صالح / (بصوت عال ) فيه ايه يادكاتره ..مالكم ..صوتكم عالى ليه ..الناس يقولوا عننا ايه ..ولا الواحد مايعرفش يرتاح وسطيكم

6
مصلح / مالنا احنا ومال الناس بس يادكتور صالح ..هو الناس بيعجبها حد …سكتنا ماحد عاجبه …اتكلمنا ماحد عاجبه
لمعى / صح والله العظيم صح …وبعدين لموأخذه لما يبقى اجتماعنا له حس والناس كلها تسمعنا وتسمع صوتنا ..ح يقدرونا ويقدروا تعبنا ويقدروا عملنا ويعرفوا اننا ما بنلعبش ..واننا بنوصل الليل بالنهار من اجل الكوسه والممبار
مصلح / كوسة ايه وممبار ايه ..انت بتخرف ولا ايه
لمعى / ليه هو انا لمواخذه قلت ايه
صالح / لا تؤاخذوه على مابدر منه ..ربما انه جوعان ..ولذا اتجه تفكيره الى مطابخ الجيران ..واطل بامعاءه على الفلفل والباذنجان
صلاح / ولحسم الخلاف فى هذه المسئله يجب الانتقال الى جدول الاعمال
مصلح وصلاح ولمعى / لا .لا لا …ليس قبل ان نتناول طعام الافطار
صالح / اذن موافقه ..لمعى بيك
لمعى / شبيك لبيك …فتحلى وبصلى بعينيك
صالح / خد ( يعطيه مائة جنيه ) ظبط وربط واوعى فى الناس تخبط ..روق المسائل وكتر فى الفلافل
لمعى / ماشى الحال ( يخرج )
يدخل ( حموده ) بصندوقه الخشبى وهو ينادى ..اصلح التعليم واغير المفاهيم
7
صلاح / مهللا …هييييه وصل ..بس تعالى يامصلحاتى …فينك من زمان ياراجل تعالى ( مغنيا)تعالى وتعالى تعالى…اصحا ياصالح اصحا يامصلح
( يصحوا صالح ومصلح ..ويرحبان بحموده )
مصلح / مرحبا يا اخى وهل تملك ادواتك لاصلاح شأن التعليم
حموده/ ماتقلقش ياضكتور ..كله هنا فى الصندوق المسحور
صالح / اريد ان اطلع عليها …هىء هىء ..اراها بأم عينى
حموده / غالى والطلب عالى ..بس متوفر فى الوقت الحالى …استعنا بالله ع الشقا يفتح الصندوق ..والصندوق به كماشه ..شاكوش …فتاحه
صلاح / هى دى ادواتك لا اصلاح التعليم يامعلم
حموده / يغلق الصندوق بقوه ..بلاش منها ..بين البايع والشارى يفتح الله يهب واقفا فيجلسانه قائلين طول بالك بس ماتبقاش حمقى الدكتور صلاح بيهذر معاك
حموده / ماهو ماوداش التعليم فى داهيه غير الهذار موش كده ولا ايه
مصلح / طاب بس اقعد يامعلم وقول لنا اسمك ايه
حموده / اسمى حموده وبيدلعونى بسعيد
المجموعه / ربنا يجعلك وش السعد علينا وعلى التعليم قادر ياكريم

8
صلاح/ بس برضه لازم قبل كتابة العقد نعرف ما يمتلكه من خبرات تؤهله للاصلاحات الجوهريه فى الامور التعليميه ..ماهى لموأخذه مش مهلبيه
حموده / محسوبك هو التاريخ ..هو الاصاله ..وخبراتى واخدها منذ عهد الكتاب ..حيث اللوح المعدنى ..والقلم المصنوع من الغاب..وماكانش عندنا حصة تكنولوجيا ..ولا حصه للالعاب
صالح / هى دى ..ياسلام ..الله يرحم زمانك
مصلح / دعنا نتجاوز هذا وندخل فى النواحى الفنيه لاصلاح العمليه التعليمه ..اقصد ..بالتجارب العمليه والمعمليه يابروفيسير هموده
حموده / يفتح الصندوق ..يخرج الكماشه ثم يسألهم ايه دى
المجموعه / دى كماشه ..وما شأنها فى اصلاح العمليه التعليميه
حموده / ها ها ها..انها اساس اصلاح التعليم ..وسأخلع بيها كل الدروس الخصوصيه من بق المجتمع ..وساقوم بتطهير فم المجتمع من أثارها القاتله
المجموعه / يصفقون برافوا برافو ..نقسم انك وضعت اصابعك على مواطن الخلل و الداء
حموده / يضع الكماشه ويخرج الشاكوش متسائلا …وما هذا
المجموعه / انه الشاكوش وما شأنه فى اصلاح العمليه التعليميه

9
حموده / ساكسر بيه الروتين المتحجر فى عقول اولياء الامور والمفاهيم اليابسه والتنافس المحموم على كليات القمه والتعليم العالى على حساب التعليم الفنى الذى ينبغى ان يكون طريقنا للحصول على العماله الفنيه الماهره التى تقود التنميه الصناعيه والزراعيه وتضعنا على الطريق الصحيح
المجموعه / اصاب الرجل اصاب الرجل …كمل يامعلم ..كمل يامعلم
حموده / يضع الشاكوش ويخرج الفتاحه متسائلا …ماهذه
مصلح / على مايبدو انها فتاحة سالمون
حموده / هى فتاحه ولكنها فتاحه غير طبيعيه انها فتاحه مسحوره
المجموعه / وماهو الدور المنوط بها فى اصلاح العمليه التعليميه
حموده / ها ها ها …سافتح بها الطرق المشروعه فقط ..لخفض الميزانيه المخصصه للتعليم …من خلال اغلاق ابواب الفساد والاموال التى تنفق على اللجان اياها ..التى ليس لها فى شىء سوى التوقيع على كشوف تشكيل اللجان من اجل الحصول على المعلوم وليس الحصول على العلم
المجموعه/ يخرب بيتك ..دا انت كده ناوى تخرب بيتنا ..يضربونه ويقولون …قوم خد الصندوق ده وغور بدل ما نكسره على دماغك
حموده / بس الاول لازم تعرفوا انا مين
المجموعه / مش عايزين مش عايزين
حموده / مبتسما لا لازم تعرفوا ياحلوين
10
اخوكم ومحسوبكم يبقى وزير التربيه والتعليم
المجموعه / ايه ؟ بتقول ايه يقعون على الارض ( ستار)
المؤلف / احمد محمد زايد

تعليقات

تعليقات

عن همسه

همسة هى مجلة كل الناس وكل الأعمار . المهنية والصدق شعارنا .ننقل الخبر من مصدره الحقيقى ونسعى دوما للتجديد من أجل القارئ

شاهد أيضاً

قارئة الفنجان .مسابقة السيناريو والحوار بقلم / عمر مصطفى محمود من مصر

خاص لل مسابقة الاسم .. عمر مصطفى محمود البلد مصر سيناريو فيلم قصير بعنوان قارئة …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *