ط
مسابقة الشعر العامى

قصيدة : ماكنتش أقصد . مسابقة الشعر العامى بقلم / طارق حمادة سعد

الاسم:طارق حمادة سعد
شعر: عامي

قصيدة بعنوان: ماكنتش أقصد
******
ماكنتش اقصد اقول كرهتك
مكانش صح اني اجازف
واقول معادش فارقلي قُربك
مكانتش هي دي الحقيقة
بل حاجة نفسي احسها
من كتر ما عذبني حبك
مانتي ياما جرحتي فيا
وياما وردك كان لي شوك
ماكنتش اقدر يوم افارق
حتى لما نويت اخونك
وعليا هونتي
اول ما شوفتك
سكرت حيطان القلب
من ريحة العطر ف عيونك
غيًر مساره
وكانت قبلته انتي
طب كيف اخون
دي الماية ليها قانون وحيد
شربتي منه انعكس
بقى ليها ريحة وطعم ولون
واحب مين انا من بعدك
وازاي تكون النسوة من غيرك
وانتي ليها بقيتي نون
م البداية
مكانش ينفع اني احبك
كل الشجر كان لي مباح
بس انتي كنتي مُحرّمة
غواني قلبي
قطفت من حبك ثماره
خرّجّني مما كنت فيه
الخريف هو السبب
صاب الجميع الا ثمارك
انما قلبي برئ
ماتجيبيش اللوم عليه
بس ذنبي ف النهاية
انا معترف ونويت اتوب
هما يا دوب سبع جمرات
وارميها على كل الحاجات
اللي بتوسوس لقلبي يحن ليكي
الأولى نظرة من عنيكي
والتانية طيبة القلب الجميل
والتالتة شعرك لو يميل
على كتفي يوم
والرابعة صوتك لو ينّسيني الهموم
وازاي يكون صوت البكا
والخامسة كانت يوم لُقا
طيفه دايما بيحاوطني
والسادسة حضن كفوف ايديكي
والكلام لحظة سكونك
والسابعة مش هرميها عمداً
علشان اشوفك مرة تانية
وتسكر حيطان القلب
من ريحة العطر ف عيونك
#ماكنتش_أقصد
#طارق_حمادة

زر الذهاب إلى الأعلى